ڈھاکہ،بنگلہ دیشی فضائیہ کا تربیتی طیارہ کالج پر گر کر تباہ،19افراد جاں بحق، 50 زخمی

ڈھاکہ(اُردو پوائنٹ اخبارتازہ ترین - این این آئی۔ 21 جولائی2025ء)بنگلہ دیش کے دارالحکومت ڈھاکہ میں ایئر فورس کا تربیتی طیارہ کالج اور سکول پر گر کر تباہ ہو گیا، جس کے نتیجے میں 19افراد جاں بحق اور 50سے زائد زخمی ہوگئے۔خبر رساں ادارے کی رپورٹ کے مطابق نیشنل انسٹیٹیوٹ آف برن اینڈ پلاسٹک سرجری کے ایک ڈاکٹر نے صحافیوں کو بتایا کہ حادثے میں جھلسنے والے بچوں سمیت 50سے زائد افراد کو ہسپتال لایا گیا۔

حکام نے تصدیق کی کہ یہ واقعہ ڈھاکہ کے شمالی علاقے اترا میں واقع مائل اسٹون اسکول اینڈ کالج میں پیش آیا۔فوج کے شعبہ تعلقات عامہ نے بتایا کہ یہ واقعہ ڈھاکا کے شمالی علاقے اترا میں پیش آیا۔ایک بیان میں کہا گیا کہ بنگلہ دیش ایئر فورس کا ایف-7بی جی آئی تربیتی طیارہ اترا میں گر کر تباہ ہو گیا، یہ طیارہ دوپہر ایک بج کر 6منٹ پر (گرین وچ معیاری وقت کے مطابق 0706بجی)پرواز کیلئے روانہ ہوا تھا۔

(جاری ہے)

حادثے کے فوراً بعد کی ویڈیوز میں دیکھا جا سکتا ہے کہ ایک لان کے قریب زبردست آگ لگی ہوئی ہے اور آسمان کی طرف دھوئیں کا گھنا بادل اٹھ رہا ہے، جبکہ لوگ دور سے منظر دیکھ رہے ہیں۔فوٹیجز میں دکھایا گیا کہ فائر فائٹرز تباہ شدہ طیارے پر پانی پھینک رہے تھے، جو ایک عمارت سے ٹکرا گیا تھا، جس سے لوہے کی گرل کو نقصان پہنچا اور عمارت میں ایک بڑا شگاف پڑ گیا۔

ڈھاکہ میڈیکل کالج اور ہسپتال کے برن یونٹ کے سربراہ بدھن سرکر نے بتایا کہ ایک تیسری جماعت کا طالبعلم مردہ حالت میں لایا گیا، جب کہ 12، 14اور 40سال کی عمر کے 3زخمیوں کو ہسپتال میں داخل کرایا گیا۔ویڈیوز میں لوگوں کو چیختے، روتے اور ایک دوسرے کو دلاسہ دیتے ہوئے بھی دیکھا گیا۔ سکول کے ایک استاد مسعود طارق نے بتایا کہ جب میں اپنے بچوں کو لینے گیا اور گیٹ پر پہنچا تو مجھے محسوس ہوا کہ پیچھے سے آیا کچھ ہے، اسی اثنا میں ایک دھماکا سنا، جب پیچھے مڑ کر دیکھا تو صرف آگ اور دھواں دکھائی دیا۔

بنگلہ دیش کی عبوری حکومت کے سربراہ محمد یونس نے کہا کہ حادثے کی وجوہات کی تحقیقات کیلئے ضروری اقدامات کیے جائیں گے اور متاثرین کو ہر ممکن مدد فراہم کی جائے گی۔انہوں نے کہا کہ ایئر فورس، طلبہ، والدین، اساتذہ، عملے اور دیگر افراد کو اس حادثے میں جو نقصان پہنچا ہے، وہ ناقابل تلافی ہے۔