وفاقی وزیرداخلہ کی بنگلہ دیشی ہم منصب سے ملاقات، باہمی دلچسپی کے امور اور دوطرفہ تعلقات بارے تبادلہ خیال کیا

ڈھاکہ (اُردو پوائنٹ اخبارتازہ ترین - اے پی پی۔ 23 جولائی2025ء) وفاقی وزیرداخلہ محسن نقوی نے بنگلہ دیش کے ہم منصب لیفٹیننٹ جنرل(ر)جہانگیر عالم چودھری سے ملاقات کی اور باہمی دلچسپی کے امور اور پاک بنگلہ دیش دوطرفہ تعلقات بارے تبادلہ خیال کیا، وزارت داخلہ آمد پر بنگلہ دیشی ہم منصب نے ان کا پرتپاک خیرمقدم کیا۔ وزارت داخلہ سے جاری بیان کے مطابق وزیر داخلہ محسن نقوی کی آمد پر بنگلہ دیشی ہم منصب نے ان کا پرتپاک خیرمقدم کیا اور انہیں گارڈ آف آنرز پیش کیا گیا۔

دونوں رہنمائوں نے ملاقات کے دوران باہمی دلچسپی کے امور اور پاک بنگلہ دیش دوطرفہ تعلقات بارے تبادلہ خیال کیا ۔ ملاقات میں سفارتی و سرکاری پاسپورٹس پر ویزا فری انٹری پر بڑی پیش رفت ہوئی ،دونوں ممالک نے سفارتی و سرکاری پاسپورٹس کو ویزا فری انٹری کی سہولت دینے کا اصولی فیصلہ کیا۔

(جاری ہے)

وزرائے داخلہ نے انٹرنل سکیورٹی اور پولیس ٹریننگ کے شعبوں میں تعاون بڑھانے پر بھی اتفاق کیا ۔

فریقین نے انسداد منشیات و انسداد انسانی سمگلنگ کے لئے اشتراک کار بڑھانے پر بات چیت کی اور انسداد دہشت گردی کے لئے مشترکہ اقدامات بارے بھی تبادلہ خیال کیا ۔ پولیس اکیڈمیز میں ٹریننگ پروگرامز کے باہمی تبادلوں پر بھی گفتگو ہوئی۔ بنگلہ دیشی وزیر داخلہ نے کہا کہ وہ ڈھاکہ آمد پر اپنے بھائی کو دل کی اتھاہ گہرائیوں سے خوش آمدید کہتے ہیں۔

انہوں نے محسن نقوی سے کہا کہ آپ کا دورہ پاک بنگلہ دیش دوطرفہ تعلقات کے فروغ کےلئے انتہائی اہم ہے۔ بنگلہ دیشی وزیر داخلہ نے پولیس ٹریننگ کی پیشکش پر وزیر داخلہ محسن نقوی کا شکریہ ادا کیا۔ بنگلہ دیش کے ساتھ انسداد دہشت گردی،منشیات و انسداد انسانی سمگلنگ کے حوالے سے بھی گفتگو ہوئی ۔ اس موقع پر پاک بنگلہ دیش دوطرفہ تعاون کے فروغ کے لئے مشترکہ کمیٹی بھی تشکیل دی گئی، پاکستان کی طرف سے وفاقی سیکرٹری داخلہ خرم آغا کمیٹی کے سربراہ ہوں گے۔

بنگلہ دیش کا اعلیٰ سطح کا وفد عنقریب سیف سٹی پراجیکٹ اور نیشنل پولیس اکیڈمی کا دورہ کرنے اسلام آباد آئے گا۔ بنگلہ دیش کے وزیر مملکت برائے داخلہ خدا بخش، سیکرٹری داخلہ نسیم الغنی، ایڈیشنل سیکرٹری سکیورٹی ڈویژن شمیم خان، پاکستانی ہائی کمیشن کے ناظم الامور محمد واصف، پولیٹیکل قونصلر کامران دہینگل اور اعلیٰ حکام بھی اس موقع پر موجود تھے۔\932