Live Updates

ڈی ایچ اے کے سیلابی پانی میں بہہ جانیوالی گاڑی کا دروازہ اور بونٹ مل گیا، باپ بیٹی کی تلاش جاری

گزشتہ روز برساتی نالے میں تلاش کا عمل مکمل کیا گیا، دریائے سواں کے داخلی و خارجی راستوں پر سرچ آپریشن کیا جا رہا ہے

ساجد علی جمعرات 24 جولائی 2025 11:34

ڈی ایچ اے کے سیلابی پانی میں بہہ جانیوالی گاڑی کا دروازہ اور بونٹ مل ..

راولپنڈی ( اُردو پوائنٹ اخبارتازہ ترین۔ 24 جولائی 2025ء ) معروف پوش ہاؤسنگ سوسائٹی ڈی ایچ اے راولپنڈی کے سیلابی پانی میں بہہ جانے والی گاڑی کا دروازہ اور بونٹ مل گیا، تاہم باپ بیٹی تاحال کوئی سراغ نہ مل سکا جن کی تلاش جاری ہے۔ تفصیلات کے مطابق وفاقی دارالحکومت اسلام آباد اور راولپنڈی میں شدید بارش کے باعث علاقہ زیر آب آ چکا تھا کہ اسی دوران ڈی ایچ اے کے رہائشی فوج کے 64 سالہ ریٹائرڈ کرنل اسحاق قاضی اپنی 25 سالہ بیٹی کے ہمراہ گاڑی میں گھر سے نکلے کہ راستے میں ان کی گاڑی خراب ہوگئی اور اسی دوران سیلابی پانی کا ایک بڑا ریلہ آ یا اور بہاؤ تیز ہونے کی وجہ سے دونوں باپ بیٹی بھی گاڑی کے ساتھ ہی پانی میں بہہ گئے، نالے میں کار سمیت بہہ جانے والے افراد گاڑی سے مدد کے لیے لوگوں کو پکارتے رہے۔

(جاری ہے)

بتایا گیا ہے کہ دو روز سے گاڑی سمیت لاپتہ ہونے والے باپ اور بیٹی کی تلاش کے لیے سرچ آپریش کیا جارہا ہے، ریسکیو حکام نے بتایا کہ پانی میں بہہ جانے والے افراد کی تلاش جاری ہے، پولیس اور ریسکیو 1122 کے غوطہ خور سرچ آپریشن میں حصہ لے رہے ہیں، گزشتہ روز ڈی ایچ اے کے برساتی نالے میں تلاش کا عمل مکمل کر لیا گیا جس کے بعد اب دریائے سواں کے داخلی و خارجی راستوں پر سرچ آپریشن کیا جا رہا ہے جہاں سے ریسکیو ٹیموں کو پہلے گاڑی کا بمپر اور سائیڈ مرر ملے تاہم گاڑی کا کچھ پتہ نہیں چل سکا تھا۔

اب معلوم ہوا ہے کہ ریسکیو ٹیموں کو متاثرہ گاڑی کا بونٹ اور دروازہ بھی دریائے سواں پل کے نیچے سے مل گیا چکا ہے جب کہ باپ اور بیٹی کی تلاش کا کام جاری ہے، اس حوالے سے اب ریسکیو حکام کی جانب سے یہ امید ظاہر کی جا رہی ہے کہ اسلام آباد اور راولپنڈی میں بارش کا سلسلہ رکنے کے بعد پانی کی سطح کم ہونے کے باعث آج دریائے سواں میں سرچ آپریشن مکمل کر لیا جائے گا۔