اے این ایف کا تعلیمی اداروں کے اطراف کریک ڈائون، 92.450کلوگرام منشیات برآمد

جمعرات 24 جولائی 2025 16:29

لاہور (اُردو پوائنٹ اخبارتازہ ترین - این این آئی۔ 24 جولائی2025ء) اینٹی نارکوٹکس فورس کا تعلیمی اداروں کے اطراف اور ملک کے مختلف شہروں میں منشیات سمگلنگ کے خلاف کریک ڈائون جاری ہے۔ترجمان اے این ایف کے مطابق 7مختلف کارروائیوں کے دوران ایک کروڑ 85لاکھ روپے سے زائد مالیت کی 92.450کلوگرام منشیات برآمد کر کے 2خواتین سمیت 7 ملزمان کو گرفتار کر لیا گیا۔

حکام کا کہنا ہے کہ جھنگ روڈ فیصل آباد میں یونیورسٹی کے قریب ملزم کے قبضے سے 8.8کلو آئس برآمد کر کے گرفتار کر لیا گیا، ملزم نے تعلیمی اداروں کے طلبہ کو منشیات فروخت کرنے کا اعتراف کیا ہے۔کراچی میں واقع کوریئر آفس میں کوئٹہ سے آسٹریلیا بھیجے جانے والے پارسل سے قالین میں جذب 17.750کلو آئس پکڑی گئی، جبکہ پشاور رنگ روڈ پر واقع کوریئر آفس سے لاہور بھیجے جانے والے پارسل سے 7.2کلو چرس برآمد ہوئی ہے۔

(جاری ہے)

اس کے علاوہ پشاور میں کرنل شیر خان ٹول پلازہ کے قریب گاڑی سے 16.8کلو چرس برآمد کر کے 2ملزمان گرفتار کئے گئے، اقبال شہید ٹول پلازہ، جی ٹی روڈ، اٹک کے قریب رکشہ سے 5.5کلو چرس پکڑ کر 2ملزمان کو حراست میں لیا گیا، جی ٹی روڈ اٹک کے قریب 2خواتین کے قبضے سے 2.4کلو چرس برآمد ہوئی جبکہ پنجگور کے علاقے بونستان میں سمگلنگ کیلئے چھپائی گئی 36کلو چرس پکڑی گئی۔ترجمان اے این ایف کے مطابق گرفتار ملزمان کے خلاف مقدمات درج کر کے تحقیقات کا آغاز کر دیا گیا ہے۔