بانی پی ٹی آئی کا جیل میں عدم سہولیات کی فراہمی کا بیان سراسر جھوٹ پر مبنی ہے،عظمی بخاری

جمعرات 24 جولائی 2025 16:54

لاہور (اُردو پوائنٹ اخبارتازہ ترین - اے پی پی۔ 24 جولائی2025ء) وزیر اطلاعات پنجاب عظمی بخاری نے کہا ہے کہ بانی پی ٹی آئی کا جیل میں عدم سہولیات کی فراہمی کا بیان سراسر جھوٹ پر مبنی ہے،دوسروں کے اے سی اتارنے والا آج سہولیات نہ ملنے کے جھوٹے پروپیگنڈے کررہا ہے،پاکستان کے نوجوان اب کسی فتنے کے جھانسے میں نہیں آئیں گے ۔جمعرات کے روز جاری اپنے ایک بیان میں انہوں نے کہا کہ بانی پی ٹی آئی کو بی کلاس کی جو سہولیات مل رہی ہیںوہ باقی بی کلاس کے قیدیوں کو میسر نہیں لہذابانی پی ٹی آئی کا جیل میں سہولیات نہ ملنے کا بیان سراسر جھوٹ پر مبنی ہے ۔

(جاری ہے)

عظمی بخاری نے کہا کہ جو شخص عید والے دن صبح بارہ بجے اٹھتا ہو وہ عام دنوں میں وضو کے لئے گندہ پانی فراہم کرنے کا جھوٹ کس منہ سے بول رہا ہے۔ انہوں نے کہا کہ جس جماعت کو لیڈ کرنے والا کوئی نہیں وہ جماعت احتجاجی تحریک کیا چلائے گی،جنہوں نے انقلاب لانا تھا وہ سب بغاوت کے مرتکب قرار پائے ہیں،9مئی کے مقدمات کے فیصلے آئین و قانون کے مطابق ہیں۔ وزیر اطلاعات نے کہا کہ قوم کے بچوں کو اپنے ناپاک عزائم کیلئے استعمال کرنے والے کے اپنے بچے امریکہ میں سیر سپاٹے کررہے،پاکستان کا نوجوان باشعور ہے اب وہ کسی فتنے کے جھانسے میں نہیں آئے گا۔