اگست 2019سے جاری یکطرفہ بھارتی اقدامات کی کوئی قانونی حیثیت نہیں ، حریت کانفرنس

سرینگر (اُردو پوائنٹ اخبارتازہ ترین - اے پی پی۔ 24 جولائی2025ء) کل جماعتی حریت کانفرنس نے کہا ہے کہ جموں وکشمیر عالمی سطح پر تسلیم شدہ متنازعہ علاقہ ہے لہذا بی جے پی کی بھارتی حکومت کی طرف سے اگست 2019 سے علاقے میں جاری یکطرفہ اقدامات کی کوئی آئینی و قانونی حیثیت نہیں ہے۔ کشمیرمیڈیاسروس کے مطابق کل جماعتی حریت کانفرنس کے ترجمان ایڈوکیٹ عبدالرشید منہاس نے سرینگر میں جاری ایک بیان میں کہا کہ 370 اور 35 اے دفعات کی منسوخی اور ڈومیسائل قوانین میں تبدیلیاں جموںوکشمیر میں مسلمانوں کی اکثریت کو اقلیت میں تبدیل کرنے کی بی جے پی ، آر ایس ایس کی منصوبہ بند سازش کا حصہ ہیں۔

انہوں نے کہا کہ کشمیری بیرونی لوگوں کو شہری کے طور پر کبھی قبول نہیں کریں گے اور وہ اپنے پیدائشی حق، حق خود ارادیت کے لیے اپنی جدوجہد جاری رکھیں گے۔

(جاری ہے)

ترجمان نے اقوام متحدہ پر زور دیا کہ وہ جنوبی ایشیا میں پائیدار امن و سلامتی کیلئے تنازعہ کشمیر کے منصفانہ حل کے لیے کردار ادا کرے۔ نئی دہلی میں بھارتی اور کشمیری سیاسی رہنماو ¿ں، سول سوسائٹی کے اراکین اور سابق بیوروکریٹس نے ایک اجلاس کے دوران جموں و کشمیر کی خصوصی حیثیت کی بحالی کا مطالبہ کیا۔

بھارتی پارلیمنٹ کے مانسون اجلاس کے دوران ہونے والے اس اجلاس کا اہتمام” فورم فار ہیومن رائٹس ان جموں وکشمیر “ نے کیا تھا۔ شرکا ءمیں فاروق عبداللہ، محمد یوسف تاریگامی، آغا روح اللہ مہدی کے علاوہ کانگریس اور حزب اختلاف کی جماعتوں کے ارکان پارلیمنٹ بھی شامل تھے۔ مقررین نے مقبوضہ جموںوکشمیر کی خصوصی حیثیت ختم کرنے کے 2019 کے فیصلے کو غیر آئینی قرار دیتے ہوئے کہا کہ کشمیری تکالیف کا شکار ہے،انہیں ان گناہوں کی سزا دی جا رہی ہے جو انہوں نے کبھی نہیں کیے ۔

اس موقع پر سابق داخلہ سکرٹری گوپال پلائی سمیت 122 سابق سرکاری افسران کی دستخط شدہ ایک عرضداشت بھی بھارتی ارکان پارلیمنٹ کو پیش کی گئی جس میں ان سے ریاستی حیثیت کی بحالی کیلئے ایوان میں قرار داد لانے کا مطالبہ کیا گیا ۔ بھارتی حکومت نے اعتراف کیا ہے کہ مقبوضہ علاقے میں کسانوں کو اپنی پیداوار کم قیمت پر فروخت کرنے پر مجبور کیا جا رہا ہے۔

وزیرزراعت شیوراج سنگھ چوہان نے بھارتی پارلیمنٹ کے ایوان زیرین لوک سبھا میں تسلیم کیا کہ 2018-19 سے کم از کم امدادی قیمتوں میں اضافے کے باوجود بہت سے کاشتکار کم قیمتوں پر اپنی اجناس بھیج رہے ہیں اور وہ قیمتوں میں اضافے سے فائدہ اٹھانے سے قاصر ہیں۔ دریں اثنا ہائی کورٹ نے بے سرو پا الزامات کے تحت قید ڈوڈہ کے رہائشی کشمیری نوجوان رحمت اللہ کی رہائی کی درخواست مسترد کر دی ہے ۔ رحمت اللہ گزشتہ برس 9نومبر سے کالے قانون پبلک سیفٹی ایکٹ کے تحت نظر بند ہیں۔ ادھر مقبوضہ جموںوکشمیر کے ضلع کپواڑہ کا رہائشی ایک45سالہ شخص بشیر احمد لون بھارتی ریاست ہماچل پردیش میں کرایے کے کمرے میں پر اسرار حالت میں مردہ پایا گیا ہے۔