پنجاب یونیورسٹی میں دو بوائز ہاسٹلز طالبات کیلئے مختص، نئے نام بھی رکھ دئیے گئے

جمعرات 24 جولائی 2025 23:17

لاہور (اُردو پوائنٹ اخبارتازہ ترین - آن لائن۔ 24 جولائی2025ء) پنجاب یونیورسٹی میں طالبات کی بڑھتی ہوئی تعداد کے پیش نظر دو بوائز ہاسٹلز کو گرلز ہاسٹلز میں تبدیل کر دیا گیا ہے۔ یونیورسٹی کے وائس چانسلر ڈاکٹر محمد علی کی خصوصی ہدایت پر یہ اقدام اٹھایا گیا جس کے نتیجے میں بوائز اور گرلز ہاسٹلز کی تعداد مساوی ہو گئی ہے۔تفصیلات کے مطابق پنجاب یونیورسٹی میں اس وقت 56 فیصد طالبات اور 44 فیصد طلباء زیر تعلیم ہیں۔

اس سے قبل طالبات کے لیے صرف 12 جبکہ طلباء کے لیے 16 ہاسٹلز مختص تھے، جس سے طالبات کو رہائش کے شدید مسائل کا سامنا تھا۔طالبات کو مساوی سہولیات فراہم کرنے کے لیے دو بوائز ہاسٹلز، ہاسٹل نمبر 17 اور خالد بن ولید ہال کو گرلز ہاسٹلز میں تبدیل کر دیا گیا ہے۔ ہاسٹل نمبر 17 کو حضرت بی بی آسیہ رضی اللہ عنہا اور خالد بن ولید ہال کو حضرت بی بی صفیہ رضی اللہ عنہا کے نام سے منسوب کر دیا گیا ہے۔

(جاری ہے)

انتظامیہ کے مطابق، تبدیل کیے گئے بوائز ہاسٹلز میں مقیم طلباء کو دیگر بوائز ہاسٹلز میں رہائش فراہم کی جائے گی۔ حالیہ ہاسٹل کلین اپ آپریشن کے دوران اضافی گنجائش پیدا ہونے کی وجہ سے یہ تبدیلی ممکن ہو سکی ہے۔پنجاب یونیورسٹی کی جانب سے یہ فیصلہ طالبات کو برابری کی بنیاد پر تعلیمی اور رہائشی سہولیات فراہم کرنے کی پالیسی کا حصہ قرار دیا گیا ہے۔ یونیورسٹی انتظامیہ کا کہنا ہے کہ مستقبل میں بھی ایسی تبدیلیاں طالبات کی ضروریات کے مطابق کی جائیں گی۔