صوبائی وزیر صحت کی زیر صدارت محکمہ سپیشلائزڈ ہیلتھ کیئر اینڈ میڈیکل ایجوکیشن میں اجلاس

جمعرات 24 جولائی 2025 23:20

لاہور (اُردو پوائنٹ اخبارتازہ ترین - اے پی پی۔ 24 جولائی2025ء) صوبائی وزیر صحت خواجہ سلمان رفیق اور سیکرٹری صحت عظمت محمود خان کی زیر صدارت محکمہ سپیشلائزڈ ہیلتھ کیئر اینڈ میڈیکل ایجوکیشن میں اہم اجلاس منعقدہواجس میں وائس چانسلر یونیورسٹی آف چائلڈ ہیلتھ سائنسز پروفیسر مسعود صادق، سپیشل سیکرٹری ڈویلپمنٹ ذیشان شبیر رانا اور چیف پلاننگ آفیسر عبدالحق بھٹی نے شرکت کی جبکہ وڈیو لنک کے ذریعے آئی ڈیپ کی ٹیم اور ڈاکٹر محمودالحسن نے شرکت کی۔

ترجمان کے مطابق اجلاس کے دوران نواز شریف میڈیکل ڈسٹرکٹ میں شامل مختلف پراجیکٹس کا تفصیلی جائزہ لیا گیا۔صوبائی وزیر صحت نے اظہار خیال کرتے ہوئے کہاکہ وزیر اعلیٰ مریم نواز کے ویژن کے مطابق صحت کے شعبہ میں تاریخی اور انقلابی اقدامات اٹھائے جا رہے ہیں، نوازشریف میڈیکل ڈسٹرکٹ کے تحت صحت کے مختلف پراجیکٹس لانچ کئے جا رہے ہیں جن کے تحت عوام کو سپیشلائزڈ ہسپتالوں کا قیام، بلڈ ڈس آرڈرز، بون میرو ٹریٹمنٹ، انسٹیٹیوٹ آف جنیٹک اینڈ بلڈ ڈیزیزز اور آرتھوپیڈکس کی سہولیات فراہم کی جائیں گی۔

(جاری ہے)

انہوں نے کہا کہ نواز شریف میڈیکل ڈسٹرکٹ کا منصوبہ نظام صحت میں جدید اصلاحات لائے گا،اس پراجیکٹ کا بنیادی مقصد عوام کو ان کی دہلیز پر صحت کی بہترین سہولیات کی فراہمی ہے۔سیکرٹری محکمہ سپیشلائزڈ ہیلتھ کیئر اینڈ میڈیکل ایجوکیشن نے کہا کہ اس پراجیکٹ کے تحت بین الاقوامی سطح کا نرسنگ انسٹیٹیوٹ قائم کیا اور پنجاب میں جین سکوائنسنگ کو فروغ دیا جائے گا۔