Live Updates

پولیس حملہ کیس،عمران خان عدالت طلب، شبلی فراز کے وارنٹ گرفتاری جاری

عدالت نے بانی پی ٹی آئی کو جیل روبکار کے ذریعے سمن جاری کردیئے، مقدمے کی سماعت جوڈیشل مجسٹریٹ سہیل رفیق نے کی،عدالت نے تحریری فیصلہ جاری کر دیا،مقدمے کی آئندہ سماعت30جولائی مقرر

فیصل علوی جمعہ 25 جولائی 2025 11:24

پولیس حملہ کیس،عمران خان عدالت طلب، شبلی فراز کے وارنٹ گرفتاری جاری

لاہور(اردوپوائنٹ اخبار تازہ ترین۔25جولائی 2025)اسلام آباد پولیس پر حملے کے مقدمہ میں عدالت نے بانی پی ٹی آئی عمران خان کو طلب کرلیا،عدالت نے پی ٹی آئی رہنماء شبلی فراز کے وارنٹ گرفتاری جاری کردئیے، عدالت نے بانی پی ٹی آئی کو جیل روبکار کے ذریعے سمن جاری کردیئے،بانی پی ٹی آئی کی رہائش گاہ کے باہر اسلام آباد پولیس پر حملے سے متعلق مقدمے کی سماعت لاہور کینٹ کچہری میں ہوئی۔

مقدمے کی سماعت جوڈیشل مجسٹریٹ سہیل رفیق نے کی۔جوڈیشل مجسٹریٹ نے اسلام آباد پولیس پر مبینہ حملے کے مقدمہ میں بانی پی ٹی آئی عمران خان کو 30 جولائی کو طلب کرلیاجوڈیشل مجسٹریٹ سہیل رفیق نے تحریری فیصلہ جاری کیا۔ عدالت نے مقدمے کی آئندہ سماعت کیلئے 30 جولائی کی تاریخ مقرر کی ہے۔تھانہ ریس کورس پولیس نے اسلام آباد پولیس پر حملے کامقدمہ درج کر رکھا ہے۔

(جاری ہے)

واضح رہے کہ گزشتہ روزاسلام آباد کی انسداد دہشتگردی عدالت نے 4اکتوبر احتجاج کیس میں عدم پیشی پر عدالت نے عمر ایوب کے وارنٹ گرفتاری جاری کر دئیے تھے۔جج طاہر عباس سپرا نے کیس کی سماعت کی،اپوزیشن لیڈر کی عدم حاضری کی بنا پر عدالت نے انکے وارنٹ گرفتاری جاری کئے گئے تھے۔عدالت نے عمر ایوب سمیت تمام غیرحاضر کارکنان کے ضمانتی مچلکے ضبط کرنے کا حکم دیدیا تھا۔

پی ٹی آئی رہنما اعظم خان سواتی کی حاضری سے استثنیٰ کی درخواست منظور کرلی گئی تھی۔بعدازاں عدالت نے غیر حاضر ملزمان کے ضمانتی مچلکے ضبط کرنے کا حکم دیتے ہوئے کیس کی سماعت 30 جولائی تک ملتوی کر دی تھی۔پی ٹی آئی رہنماء عمرایوب سمیت دیگر ملزمان کیخلاف تھانہ شہزاد ٹاؤن میں مقدمات درج تھے۔قبل ازیں بھی راولپنڈی کی انسداد دہشتگری عدالت نے 26نومبر احتجاج کے تین مقدمات میں عدم گرفتار ملزمان کے وارنٹ گرفتاری جاری کئے تھے۔

مقدمات میں مطلوب پی ٹی آئی رہنماؤں کی گرفتاری کیلئے پولیس ٹیمیں تشکیل دے دی گئیں تھیں۔ پولیس کی خصوصی ٹیمیں کو چھاپہ مار کارروائیوں کی ہدایات دیدی گئیں تھیں۔ملزمان میں پی ٹی آئی رہنماء عارف علوی، وزیر اعلیٰ خیبر پختونخوا علی امین گنڈا پور، اپوزیشن لیڈر قومی اسمبلی عمر ایوب، سابق سپیکر قومی اسمبلی اسد قیصر کے نام شامل تھے۔جبکہ حماد اظہر، شاہد خٹک، خالد خورشید،فیصل امین، وہاب علوی،شہریار ریاض اور دیگر پی ٹی آئی رہنماؤں کے بھی وارنٹ گرفتاری جاری کئے گئے تھے۔