خیبرپختونخوا ہ میں کوئی نیا آپریشن نہیں ہو رہا، ادارے نیشنل ایکشن پلان پر عمل کر رہے ہیں‘ طلال چوہدری

جمعہ 25 جولائی 2025 13:39

لاہور(اُردو پوائنٹ اخبارتازہ ترین - این این آئی۔ 25 جولائی2025ء)وزیر مملکت برائے داخلہ طلال چوہدری نے کہا ہے کہ خیبرپختونخوا میں کوئی نیا آپریشن نہیں ہو رہا، فورسز اور وفاقی و صوبائی ادارے نیشنل ایکشن پلان پر عملدرآمد کر رہے ہیں، سب سے زیادہ دہشتگردی خیبرپختونخوا ہ میں ہے جس کے خلاف ادارے بنانے میں صوبہ پیچھے رہ گیا ہے۔

(جاری ہے)

ایک انٹر ویو میں وزیر مملکت برائے داخلہ طلال چوہدری نے کہا کہ اگر سی ٹی ڈی، فرانزک لیب اور سیف سٹی نہ ہوں تو دہشت گردی سے کیسے مثر طریقے سے لڑا جا سکتا ہی وفاق داخلی اور خارجی خطرات سے نمٹنے کے لیے اپنے وسائل بروئے کار لا رہا ہے اور نیشنل ایکشن پلان پر عمل جاری رہے گا۔

انہوں نے کہا کہ صوبوں کو یاد دلاتے رہیں گے کہ امن و امان کی ذمہ داری آپ کی ہے۔ خیبرپختونخواہ کی فورسز قربانیاں دے رہی ہیں لیکن سیاسی لیڈرشپ کمپرومائزڈ ہے اور دہشتگردوں سے خوفزدہ دکھائی دیتی ہے۔وزیر مملکت نے اپوزیشن کو تنقید کا نشانہ بناتے ہوئے کہا کہ نائب وزیراعظم اور وزیر داخلہ کے دوروں پر تنقید کے بجائے آپ اپنا کام کریں۔ وفاق کے کام میں نہ جھانکیں اور سیاسی پوائنٹ اسکورنگ سے گریز کریں۔