معاون خصوصی وزیر اعلیٰ سندھ محمد سلیم بلوچ نے آئی بی اے پاس 275 سب انجینئرز کو آفر لیٹرز تقسیم کردیے

آج کا دن چیئرمین پیپلز پارٹی بلاول بھٹو زرداری کے وعدے "روزگار سب کے لیی" کی تکمیل کا حصہ ہے، محمد سلیم بلوچ

جمعہ 25 جولائی 2025 19:35

کراچی (اُردو پوائنٹ اخبارتازہ ترین - این این آئی۔ 25 جولائی2025ء)وزیر اعلی سندھ کے معاون خصوصی برائے پبلک ہیلتھ انجینئرنگ و دیہی ترقی محمد سلیم بلوچ نے آئی بی اے پاس 275 سب انجینئرز کو آفر لیٹرز تقسیم کردیے۔ آفر لیٹرز تقسیم کرنے کی تقریب معاون خصوصی محمد سلیم بلوچ کے دفتر میں منعقد ہوئی۔ تقریب سے خطاب میں معاون خصوصی محمد سلیم بلوچ نے کہا کہ آج کا دن چیئرمین پیپلز پارٹی بلاول بھٹو زرداری کے وعدے "روزگار سب کے لیی" کی تکمیل کا حصہ ہے۔

انھوں نے کہا کہ چئیرمین بلاول بھٹو زرداری، وزیر اعلی سندھ، فریال تالپور کی ہدایت پر تمام بھرتیاں میرٹ پر کیں۔ انھوں نے سب انجینئرز کی پوسٹس کے لیے آفر لیٹر وصول کرنے والے تمام افراد کو خوش آمدید کہتے ہوئے کہا کہ انھیں بہت خوشی ہے کہ آج 275 نئے آئی بی اے ٹیسٹ پاس امیدواران کو آفر لیٹرز تقسیم کررہے ہیں۔

(جاری ہے)

انھوں نے کہا کہ میرٹ اور شفافیت کے لیے ہم نے آئی بی اے سکھر کی خدمات حاصل کی تھیں، ہماری خالی اسامیوں پر چھ ہزار افراد نے اپلائی کیا جن میں سے 1792 افراد نے امتحان پاس کیا تھا. جس کے بعد تمام پاس امیدواران کے انٹرویوز کیے گئے۔

انھوں نے کہا کہ انٹرویو کمیٹی میں این ای ڈی یونیورسٹی، مہران یونیورسٹی کے اساتذہ، ایس این جی اے ڈی اور محکمہ کے افسران شامل تھے، دو ماہ تک تمام کامیاب امیدواروں کا انٹرویو مشکل مرحلہ تھا تاہم شفاف انٹرویوز کے انعقاد پر کمیٹی کو مبارکباد پیش کرتا ہوں۔ انھوں نے کہا کہ محکمہ پبلک ہیلتھ انجینئرنگ میں فیلڈ کا کام ہوتا ہے اور مجھے خوشی ہے کہ مرد نوجوانوں کے ساتھ لڑکیوں نے بھی اس فیلڈ میں قدم رکھا ہے۔ انھوں نے کہا کہ خواتین نے زندگی کے ہر شعبے میں کو خود کو منوایا ہے، خواتین سب انجینئرز کی محکمہ پبلک ہیلتھ انجینئرنگ میں شمولیت ایک اچھا اضافہ ہے۔ انھوں نے امید ظاہر کی کہ نئے بھرتی ہونے والے سب انجینئرز اپنی بھرپور خدمات سے محکمے کا نام روشن کریں گے۔