وفاقی وزیر خزانہ کی زیرصدارت ای سی سی کا اجلاس، صنعت، ہائوسنگ، ٹیلی کام اور ماحولیات سے متعلق اہم فیصلوں کی منظوری

اسلام آباد(اُردو پوائنٹ اخبارتازہ ترین - این این آئی۔ 25 جولائی2025ء)وفاقی وزیر خزانہ و محصولات سینیٹر محمد اورنگزیب کی زیرصدارت کابینہ کی اقتصادی رابطہ کمیٹی (ای سی سی)کا اجلاس جمعہ کو منعقد ہوا۔ اجلاس میں صنعتی ترقی، ماحولیاتی پالیسی، ہنر مندی کے فروغ، ہائوسنگ فنانس اور ٹیلی کمیونیکیشن کے شعبوں سے متعلق اہم ایجنڈا آئٹمز پر غور کیا گیا۔

اجلاس میں وفاقی وزیر برائے توانائی سردار اویس احمد خان لغاری، وفاقی وزیر برائے پٹرولیم علی پرویز ملک، وزیر تجارت جام کمال خان اور متعلقہ وزارتوں، ڈویژنوں، محکموں اور اتھارٹیز کے سینئر حکام نے شرکت کی۔ای سی سی نے وزارت تجارت کی جانب سے پیش کردہ رپورٹ کی توثیق کی جس میں سٹیل سیکٹر کی صنعتی مسابقت اور برآمدی ترقی کے لیے نیشنل ٹیرف پالیسی 202530 کے تحت پیداواری لاگت میں کمی اور برآمدی صلاحیت میں بہتری کی سفارشات شامل تھیں۔

(جاری ہے)

کمیٹی نے لاہور ہائی کورٹ کے فیصلے کے خلاف سپریم کورٹ میں اپیل دائر کرنے کی وزارت تجارت کی درخواست کی بھی منظوری دی جو میسرز غنی گلاس لمیٹڈ کو گیس/آر ایل این جی پر رعایتی نرخوں سے متعلق تھا۔ ای سی سی نے قرار دیا کہ چونکہ پانچ برآمدی شعبوں کے لیے توانائی پر دی جانے والی رعایتیں پہلے ہی ختم کی جا چکی ہیں، اس لیے اس اپیل کی کوئی قانونی بنیاد نہیں بنتی۔

ماحولیاتی تحفظ کی جانب ایک اہم قدم اٹھاتے ہوئے ای سی سی نے وزارت موسمیاتی تبدیلی و ماحولیاتی ہم آہنگی کی تجویز پر پاکستان گرین ٹیکسونومی کی منظوری دی۔ چیئرمین نے اس اقدام کو سراہتے ہوئے کہا کہ یہ دیرینہ ضرورت تھی اور ملک میں ماحول دوست منصوبوں کے لیے فنانسنگ کے مواقع فراہم کرنے میں کلیدی کردار ادا کرے گا۔ہنر مندی کے فروغ کے لیے نتائج پر مبنی مالی ماڈل کی حمایت کرتے ہوئے ای سی سی نے وزارت تعلیم و پیشہ ورانہ تربیت کی جانب سے پاکستان سکل امپیکٹ بانڈ (پی ایس آئی بی) کے اجرا کے لیے 1 ارب روپے کی حکومتی گارنٹی کی منظوری دی۔

کمیٹی نے وزارت پر زور دیا کہ وہ بتدریج پبلک پرائیویٹ پارٹنرشپ ماڈل کی طرف منتقل ہو اور مستقبل میں خود مختار مالیاتی حکمت عملی اختیار کرے تاکہ حکومتی ضمانتوں پر انحصار کم ہو۔رہائش کے شعبے میں ای سی سی نے کم لاگت ہائوسنگ فنانس کے لیے مارک اپ سبسڈی اور رسک شیئرنگ سکیم کی منظوری دی تاکہ غریب طبقے کو گھر حاصل کرنے میں مدد فراہم کی جا سکے۔

کمیٹی نے وزارت کو ہدایت دی کہ وہ وفاقی و صوبائی اداروں کے تعاون سے ہائوسنگ سیکٹر کا جامع اور مربوط ڈیٹا بیس تیار کرے تاکہ اس سکیم کو موثر اور درست انداز میں نافذ کیا جا سکے۔وزارت صنعت و پیداوار نے کمیٹی کو ویجیٹیبل گھی اور تیل کی دستیابی اور قیمتوں کے رجحانات سے آگاہ کیا۔ اگرچہ وزارت نے ملک میں مناسب ذخائر کی یقین دہانی کرائی، کمیٹی نے عالمی منڈی میں قیمتوں میں کمی کے باوجود مقامی سطح پر صارفین کو اس کا فائدہ نہ پہنچنے پر تشویش کا اظہار کیا۔

کمیٹی نے وزارت پر زور دیا کہ وہ قیمتوں کی نگرانی کے لیے مسابقتی کمیشن، نیشنل پرائس مانیٹرنگ کمیٹی (این پی ایم سی) اور صوبائی حکومتوں سے قریبی رابطہ رکھے۔ٹیلی کمیونیکیشن کے شعبے میں ای سی سی نے وزارت آئی ٹی و ٹیلی کام کی تجویز پر ریڈیو بیسڈ سروسز (آر بی ایس) کی فیسوں میں ردوبدل کی منظوری دی۔ کمیٹی نے وزارت کو ہدایت دی کہ وہ ہر 3 سے 5 سال بعد ان فیسوں کا ازسرنو جائزہ لے تاکہ اقتصادی تبدیلیوں اور ٹیکنالوجی کی ترقی سے ہم آہنگ رہا جا سکے۔

علاوہ ازیں کمیٹی نے آئی ایم ٹی سپیکٹرم کی ریلیز کی نگرانی کرنے والی مشاورتی کمیٹی کی نئی تشکیل کی بھی توثیق کی جو پاکستان میں جدید موبائل براڈ بینڈ خدمات کے فروغ کے لیے نہایت اہم ہے۔ ای سی سی نے وزارت بحری امور کی سفارش پر شپ بریکنگ اور ری سائیکلنگ کو ایک تسلیم شدہ صنعت قرار دینے کی منظوری دے دی تاہم کمیٹی نے وزارت کو ہدایت دی کہ وہ پاور ڈویژن سے اس شعبے میں بجلی کے استعمال کا ڈیٹا شیئر کرے تاکہ صنعتی نرخ لاگو کرنے کی صورت میں ممکنہ اثرات کا درست اندازہ لگایا جا سکے۔