ورلڈ چیمپئن شپ آف لیجنڈز‘ پاکستان چیمپئنز نے جنوبی افریقا کو ہرا دیا

ہفتہ 26 جولائی 2025 13:31

لندن(اُردو پوائنٹ اخبارتازہ ترین - این این آئی۔ 26 جولائی2025ء)ورلڈ چیمپئن شپ آف لیجنڈز میں پاکستان چیمپئنز نے جنوبی افریقا کو 31 رنز سے شکست دے دی۔پاکستان چیمپئن کی جانب سے دیے گئے 199 رنز کے تعاقب میں جنوبی افریقا چیمپئن کی ٹیم مقررہ اوورز میں 9 وکٹوں کے نقصان پر 167 رنز بناسکی۔مورے وین وک کی 20 گیندوں پر 44 رنز کی اننگز رائیگاں گئی، ہاشم آملہ 12 رنز بنا کر آؤٹ ہوئے، جے پی ڈومینی 11 رنز بنا کر پویلین لوٹ گئے۔

وین پارنیل 21 رنز بنا کر وہاب ریاض کی گیند پر بولڈ ہوگئے۔پاکستان کی جانب سے سہیل تنویر اور کپتان محمد حفیظ نے دو، دو کھلاڑیوں کو آؤٹ کیا۔ رومان رئیس، عماد وسیم، سہیل خان، شعیب ملک اور وہاب ریاض نے ایک، ایک وکٹ حاصل کی۔اس سے قبل پاکستان چیمپئنز نے مقررہ اوورز میں 5 وکٹوں کے نقصان پر 198 رنز بنائے تھے اور جنوبی افریقا چیمپئنز کو جیت کے لیے 199 رنز کا ہدف دیا تھا۔

(جاری ہے)

عمر امین نے شاندار نصف سنچری اسکور کرتے ہوئے 58 رنز بنائے تھے جبکہ شعیب ملک 46 رنز کے ساتھ ناٹ آؤٹ رہے تھے، شرجیل خان 19، کامران اکمل 17 رنز بنا کر آؤٹ ہوئے۔کپتان محمد حفیظ 8 رنز بنائے جبکہ آصف علی نے 11 گیندوں پر 23 رنز کی اننگز کھیلی۔جنوبی افریقا چیمپئنز کی جانب سے اولیور نے دو کھلاڑیوں کو آؤٹ کیا تھا، وین پارنیل اور جے پی ڈومینی نے ایک، ایک وکٹ حاصل کی تھی۔