پی ٹی آئی چھوڑ کر حماد اظہر کے کسی اور جماعت میں شمولیت کی افواہیں

لاہور ( اُردو پوائنٹ اخبارتازہ ترین۔ 26 جولائی 2025ء )پاکستان تحریک انصاف کے رہنماء حماد اظہر کے پی ٹی آئی چھوڑ کر کسی اور جماعت میں شمولیت کی افواہوں سے متعلق اہم بیان جاری کردی گیا۔ تفصیلات کے مطابق اس حوالے سے زیر گردش افواہیں جھوٹ اور پروپیگنڈا قرار دی گئی ہیں، جن کے بارے میں پی ٹی آئی کے وکیل ابوذر سلمان نیازی کا کہنا ہے کہ حماد اظہر کے کسی اور جماعت جیسا کہ مسلم لیگ ن میں شامل ہونے کی خبریں مکمل طور پر جھوٹی اور محض پروپیگنڈا ہیں، میں حماد اظہر کے ساتھ موجود ہوں اور وہ خود کہہ رہے ہیں کہ ’اپنی آخری سانس تک عمران خان کے ساتھ ہوں‘۔

بتایا جارہا ہے کہ حماد اظہر نے عدالت کے سامنے سرنڈرکرنے کا فیصلہ کیا ہے، اس سلسلے میں انہوں نے قریبی ساتھیوں سے مشاورت مکمل کرلی ہے اور حتمی مشاورت کیلئے انہوں نے وکلاء کی ٹیم کو بھی بلایا ہے، بتایا جارہا ہے کہ حماد اظہر نے ممکنہ گرفتاری کے خلاف عدالت سے رجوع کرنے کا فیصلہ کیا ہے، انہوں نے قانونی ٹیم کو فوری طور پر طلب کیا ہے تاکہ عدالت میں پیشی اور ضمانت کیلئے درکار قانونی لائحہ عمل طے کیا جا سکے، جس کے بعد رہنماء پی ٹی آئی عدالت کے سامنے پیش ہوکر ضمانت کی در خواست دیں گے، تاہم اس کے ساتھ حماد اظہر نے یہ فیصلہ بھی کیا ہے کہ اگر عدالت سے ضمانت نہ ملی تو وہ جیل جانے کو بھی تیار ہیں۔

(جاری ہے)

یاد رہے کہ پی ٹی آئی رہنما حماد اظہر 2 سال روپوش رہنے کے بعد اپنے والد کی وفات پر سامنے آئے، اپنے ایک پیغام میں انہوں نے کہا کہ اپنی اور اپنے خاندان کی طرف سے ان ہزاروں ساتھیوں کا شکر گزار ہوں جنہوں نے میرے والد کے جنازے میں اور قرآن خوانی میں شرکت کی اور ان لاکھوں افراد کا بھی شکریہ جنہوں نے افسوس کے پیغامات بھجوائے اور ان کی مغفرت کیلئے دعا کی، تمام سیاسی جماعتوں کے قائدین جنہوں نے ان کی یاد میں بہترین الفاظ کہے میرے والد میاں اظہر مرحوم کیلئے دعا کی ہم ان کے بھی مشکور ہیں۔

رہنما تحریک انصاف کا یہ بھی کہنا تھا کہ میرے والد کی میراث شرافت، ایمانداری اور وضع داری ہے جو صرف میرے لیے ہی نہیں بلکہ پورے پاکستان کے سیاسی کلچر کیلئے ایک اثاثہ اور شاندار روایت ہے، اپنے والدین کا اکلوتا بیٹا، تین بہنوں کا واحد بھائی اور دو کم سن بچوں کا باپ ہوں، مجھ سے زیادہ تکلیف اور دکھ میرے گھر والوں نے دو سال سے زائد عرصہ تک برداشت کیے۔

حماد اظہر نے کہا کہ ظاہر ہے کہ میں اس دکھ کی گھڑی میں اپنے گھر والوں خصوصی طور پر اپنی والدہ کے ساتھ اب موجود رہنے کی خواہش رکھتا ہوں، میں بے گناہ ہوں اور جعلی پرچوں کا نشانہ ہوں جن کا کوئی سر پیر نہیں، اس سلسلے میں عدالت سے رجوع کروں گا اور انصاف طلب کروں گا، مل گیا تو اللہ کا شکر ادا کروں گا اور نہ ملا تو استقامت اور صبر سے مزید جبر برداشت کروں گا، بے شک اللہ صابرین کا ساتھ دینے والا ہے۔