حکومت فلاحی پروگراموں میں شفافیت اور احتساب کیلئےپرعزم ہے،وفاقی وزیر ڈاکٹر طارق فضل چوہدری

ہفتہ 26 جولائی 2025 23:00

اسلام آباد (اُردو پوائنٹ اخبارتازہ ترین - اے پی پی۔ 26 جولائی2025ء) وفاقی وزیر برائے پارلیمانی امور ڈاکٹر طارق فضل چوہدری نے کہا ہے کہ حکومت اپنے تمام سماجی معاونت کے پروگراموں میں شفافیت، احتساب اور عوامی فلاح و بہبود کے لئے پرعزم ہے۔ہفتہ کو نجی ٹی وی سے بات کرتے ہوئےانہوں نے واضح کیا کہ ورلڈ فوڈ پروگرام (ڈبلیو ایف پی) کے ساتھ حکومت کا تعاون پسماندہ طبقات بالخصوص خواتین اور بچوں کی مدد کے مشترکہ مقاصد پر مبنی ہے۔

انہوں نے کہا کہ حکومت پاکستان کی جانب سے فنڈز فراہم کیے جانے کے باوجود اس عمل کے دوران پبلک پروکیورمنٹ ریگولیٹری اتھارٹی (پی پی آر اے) کے قوانین پر عمل نہیں کیا گیا۔انہوں نے کہا کہ خریداری ڈبلیو ایف پی کے ذریعے آزادانہ طور پر کی گئی ہے لیکن سرکاری فنڈز کے استعمال کے لیے مقامی ضوابط کی سختی سے پابندی کی ضرورت ہوتی ہے۔

(جاری ہے)

انہوں نے مزید وضاحت کی کہ یہ معاملہ اس وقت متعلقہ پارلیمانی قائمہ کمیٹی کے زیرِ جائزہ ہے، جو اس بات کا جائزہ لے گی کہ آیا معیاری طریقہ کار کا مشاہدہ کیا گیا ہےیا نہیں۔

انہوں نے اس بات پر زور دیا کہ تمام حکومتی فیصلے احتساب کو یقینی بنانے کے لیے قائم کردہ قوانین اور نگرانی کے طریقہ کار کے تابع ہیں۔انہوں نے کہا کہ ڈبلیو ایف پی اور آئی ایم ایف جیسی بین الاقوامی تنظیموں کے ساتھ پاکستان کی شراکت داری کا تسلسل تمام حکومتوں میں جاری رہتا ہے جوقومی فلاح و بہبود کی کوششوں میں بامعنی حصہ ڈال رہی ہیں۔