ناران، کاغان، جھیل سیف الملوک سمیت دیگر مقامات پر داخلے سے قبل انٹری فیس لازم قرار

پیر 28 جولائی 2025 14:10

پشاور (اُردو پوائنٹ اخبارتازہ ترین - اے پی پی۔ 28 جولائی2025ء) خیبرپختونخوا حکومت نے ناران، کاغان، جھیل سیف الملوک سمیت دیگر مقامات پر داخلے سے قبل انٹری فیس لازم قرار دے دی۔ٹورازم اتھارٹی خیبرپختونخواکے مطابق اب کسی بھی سیاح کو ان مقامات میں بغیر فیس داخلے کی اجازت نہیں دی جائے گی، کاغان ویلی میں باقاعدہ طور پر انٹری فیس مقرر کرنے کا فیصلہ کر لیا گیا ہے اور حسام آباد کے مقام پر انٹری فیس وصولی کے لیے پوائنٹ قائم کیا جائے گا۔

(جاری ہے)

بڑی گاڑی کے لیے 200 روپے، چھوٹی گاڑی کے لیے 100 روپے اور موٹر سائیکل کے لیے 20 روپے بطور انٹری فیس وصول کیے جائیں گے تاہم مقامی افراد کو اس فیس سے استثنیٰ حاصل ہوگا۔انٹری فیس سے حاصل ہونے والی آمدن ماہانہ لاکھوں روپے تک پہنچنے کی توقع ہے جس سے نہ صرف کاغان ڈویلپمنٹ اتھارٹی کی مالی صورتحال بہتر ہوگی بلکہ سیاحوں کو مزید سہولیات بھی فراہم کی جا سکیں گی۔سیکرٹری سیاحت ڈاکٹر عبدالصمد کے مطابق انٹری فیس کا مقصد آمدن بڑھانے کے ساتھ ساتھ سیاحوں کو معیاری سہولیات کی فراہمی کو یقینی بنانا ہے، بورڈ آف گورنرز نے انٹری فیس کے نفاذ کی باقاعدہ منظوری دے دی ہے اور جلد اس فیصلے پر عملدرآمد شروع کر دیا جائے گا۔