اوگرا کے زیر اہتمام اجلاس، ٹریک اینڈ ٹریس سسٹم کی پیشرفت ،آئندہ کے لائحہ عمل پر تبادلہ

پیر 28 جولائی 2025 21:24

اسلام آباد (اُردو پوائنٹ اخبارتازہ ترین - این این آئی۔ 28 جولائی2025ء)اوگرانے پاکستان کی پٹرولیم انڈسٹری کے اہم اسٹیک ہولڈرز کے ساتھ ایک اجلاس منعقد کیا جس میں ملک گیر ٹریک اینڈ ٹریس سسٹم کی پیش رفت اور آئندہ کے لائحہ عمل پر تبادلہ خیال کیا گیا۔ یہ سیشن اوگرا کے ڈیجیٹلائزیشن ایجنڈے کا حصہ ہے جس کا مقصد سپلائی چین انڈسٹری میں شفافیت، حفاظت اور موثریت کو فروغ دینا ہے۔

اوگرا کے چیئرمین مسرور خان کی زیرصدارت اس اجلاس میں ممبر آئل زین العابدین، ممبر فنانس شکیل احمد،ڈائریکٹر جنرل ایکسپلوزِوز ، ڈائریکٹر جنرل آئل، اور چیئرمین او سی اے سی سمیت 100 سے زائد شرکا نے شرکت کی جن میں PSO، PARCO، APL، ARL، NRL اور دیگر معروف آئل مارکیٹنگ کمپنیوں کے نمائندے بھی موجود تھے۔

(جاری ہے)

چیئرمین اوگرا نے پٹرولیم سپلائی چین کو جدید خطوط پر استوار کرنے اور غیر قانونی سرگرمیوں کے خاتمے کے لیے ڈیجیٹل نظام کو ناگزیر قرار دیا۔

ممبر آئل نے بتایا کہ یہ نظام ریفائنری سے ریٹیل آٹ لیٹس تک پٹرولیم مصنوعات کی نقل و حرکت کی نگرانی کرے گا جس میں ERP، GPS اور مرکزی ڈیش بورڈز شامل ہیں۔اوگرا کے مطابق اب تک 29آئل مارکیٹنگ کمپنیاں ERP استعمال کر رہی ہیں اور تقریبا 15ہزار آئل ٹینکرز جی پی ایس سے لیس ہیں جو اوگرا کی آئندہ مانیٹرنگ اور انفورسمنٹ کو موثر بنائیں گے۔