احتجاج یا مارچ پی ٹی آئی قیادت 31 جولائی کو پشاور میں سر جوڑ کر بیٹھے گی

منگل 29 جولائی 2025 16:11

پشاور(اُردو پوائنٹ اخبارتازہ ترین - این این آئی۔ 29 جولائی2025ء) پاکستان تحریکِ انصاف (پی ٹی آئی) نے آئندہ احتجاجی حکمتِ عملی طے کرنے کیلئے 31 جولائی کو اہم مشاورتی اجلاس پشاور میں طلب کر لیا ہے۔اجلاس پی ٹی آئی کی مرکزی قیادت نے طلب کیا ہے جس میں چیئرمین پی ٹی آئی، سیکرٹری جنرل اور دیگر قائدین شرکت کریں گے، اجلاس میں آئندہ ممکنہ احتجاج کے تمام پہلوؤں پر تفصیلی غور کیا جائے گا۔

(جاری ہے)

ذرائع کے مطابق اجلاس میں اس بات کا فیصلہ کیا جائے گا کہ احتجاج مرکز (اسلام آباد) کی جانب مارچ کی صورت میں کیا جائے یا صوبائی سطح پر احتجاج ریکارڈ کرایا جائے، پارٹی کے پاس احتجاج کے اور کتنے آپشنز موجود ہیں، اس پر بھی مشاورت ہوگی۔ذرائع کا کہنا ہے کہ پارٹی کے متعدد رہنما دوبارہ اسلام آباد کی جانب مارچ کے حق میں نہیں۔اس حوالے سے اپوزیشن لیڈر قومی اسمبلی عمر ایوب نے کہا کہ احتجاج کے امور کو جلد فائنل کیا جائے گا، 31 جولائی کو طلب کئے گئے اجلاس میں تمام معاملات کو حتمی شکل دی جائے گا۔