رواں مون سون بارشوں کے نتیجے میں 158 شہری جاں بحق ،558 زخمی ، 214 گھر متاثر اور 121 مویشی ہلاک ہوئے، ترجمان پی ڈی ایم اے

لاہور (اُردو پوائنٹ اخبارتازہ ترین - اے پی پی۔ 30 جولائی2025ء) وزیر اعلی پنجاب مریم نواز شریف کی ہدایات کے پیشِ نظر پی ڈی ایم اے نے مون سون فیکٹ شیٹ جاری کر دی۔رواں سال مون سون بارشوں کے نتیجے میں 158 شہری جاں بحق ،558 زخمی جبکہ 214 گھر متاثر اور 121 مویشی ہلاک ہوئے۔ ترجمان پی ڈی ایم اے کے مطابق فیکٹ شیٹ میں مون سون بارشوں کی صورتحال، پنجاب کے دریاں، بیراجز اور ڈیمز میں پانی کی سطح بارے اعداد و شمار شامل ہیں ۔

گزشتہ 24 گھنٹوں میں جہلم میں 83، راولپنڈی 81، منڈی بہاوالدین 49، منگلا 48، گجرات 42، سیالکوٹ اور گوجرانولہ 39 اور ڈی جی خان میں 33 ملی میٹر بارش ریکارڈ کی گئی۔ مون سون بارشوں کاپانچواں سلسلہ 31 جولائی تک رہنے کے امکانات ہیں۔مون سون بارشوں کے باعث پنجاب کے دریاں اور ندی نالوں میں طغیانی کا خدشہ ہے ۔

(جاری ہے)

پی ڈی ایم اے کے ترجمان کے مطابق وزیر اعلی پنجاب کی ہدایات کے پیشِ نظر صوبے بھر کی انتظامیہ اور متعلقہ محکموں کو الرٹ جاری کر دیا گیا ہے ۔

گزشتہ 24 گھنٹوں میں بارشوں کے باعث حادثات سے کوئی جانی نقصان نہیں ہوا ۔ترجمان کے مطابق رواں سال مون سون بارشوں میں حادثات کے باعث 158 شہری جاں بحق اور558 زخمی ہوئے جبکہ 214 گھر متاثر اور 121 مویشی ہلاک ہوئے ۔زیادہ تراموات آسمانی بجلی ،مخدوش عمارتوں کے گرنے، دریاوں میں نہاتے ہوئے ڈوبنے اور کرنٹ لگنے سے ہوئیں ۔ ڈی جی پی ڈی ایم اے عرفان علی کاٹھیا نے کہا ہے کہ وزیر اعلی پنجاب کی ہدایات کے پیشِ نظر سوگوار خاندانوں کی مالی معاونت یقینی بنائی جا رہی ہے۔

کسانوں کی فصلوں اور مویشیوں کے نقصانات کا بھی ازالہ کیا جائے گا ۔ڈی جی پی ڈی ایم اے کے مطابق منگلا ڈیم میں 57 فیصد جبکہ تربیلا میں 87 فیصد پانی موجود ہے۔انڈین ڈیمز میں پانی کی سطح تقریبا 43 تک فیصد ہے۔دریائے سندھ میں کالا باغ، تربیلا، تونسہ اور چشمہ کے مقام پر نچلے درجے کا سیلاب ہے ۔دریائے چناب ،راوی ،جہلم اور ستلج میں پانی کا بہا فی الحال نارمل سطح پر ہے۔

ڈی جی عرفان علی کاٹھیا نے کہاکہ ممکنہ سیلابی خطرے کے پیشِ نظر پی ڈی ایم اے کے انتظامات مکمل ہیں۔ پی ڈی ایم اے کنٹرول روم اور ڈسٹرکٹ ایمرجنسی آپریشن سنٹرز مسلسل صورتحال کو مانیٹر کر رہے ہیں۔ ڈی جی پی ڈی ایم اے کہا کہ حکومت پنجاب کی جانب سے دریاوں ،نہروں اور برساتی نالوں میں نہانے پر مکمل پابندی عائد ہے۔خلاف ورزی کی صورت میں سخت ایکشن لیا جائے گا ۔ڈی جی پی ڈی ایم اے نے کہا کہ شہری خراب موسم میں غیر ضروری سفر سے گریز کریں۔بجلی کی تاروں اور کھمبوں سے دور رہیں مخدوش و بوسیدہ مکانات میں ہرگز رہائش نہ رکھیں ۔ ہنگامی صورتحال میں پی ڈی ایم اے ہیلپ لائن 1129 پر کال کریں۔