این ڈی ایم اے نے 3 اگست تک شدید موسمی صورتحال پر الرٹ جاری کردیا

بدھ 30 جولائی 2025 17:25

اسلام آباد (اُردو پوائنٹ اخبارتازہ ترین - اے پی پی۔ 30 جولائی2025ء) نیشنل ڈیزاسٹر مینجمنٹ اتھارٹی (این ڈی ایم اے) کے نیشنل ایمرجنسیز آپریشن سینٹر نے 3 اگست تک ملک بھر میں شدید موسمی صورتحال اور ممکنہ خطرات کے پیش نظر الرٹ جاری کیا ہے۔ترجمان این ڈی ایم اے کے مطابق ملک کے مختلف علاقوں میں شہری سیلاب، ندی نالوں میں طغیانی اور گلگت بلتستان و خیبر پختونخوا کے پہاڑی علاقوں میں گلیشیئر کے پھٹنے سے سیلاب کا خطرہ ہے۔

اسلام آباد، راولپنڈی، گوجرانوالہ، لاہور، سیالکوٹ، خوشاب اور نارووال میں شہری سیلاب کا خدشہ ظاہر کیا گیا ہے۔ اس کے علاوہ بین، بسنتر اور ڈیگ نالوں میں پانی کے بہاؤ میں اضافے کے باعث شمال مشرقی پنجاب میں سیلابی صورتحال پیدا ہو سکتی ہے۔خیبر پختونخوا کے علاقوں میں اگلے 12 سے 24 گھنٹوں کے دوران شدید بارشوں کی پیش گوئی کی گئی ہے جن سے نشیبی علاقوں میں اچانک سیلاب اور پہاڑی علاقوں میں لینڈ سلائیڈنگ کا خطرہ ہے۔

(جاری ہے)

متاثرہ علاقوں میں چترال، دیر، سوات، کالام، مانسہرہ، بٹگرام، ایبٹ آباد، ہری پور، صوابی، مردان، پشاور، چارسدہ، کوہاٹ، ہنگو، بنوں، لکی مروت اور ڈی آئی خان شامل ہیں۔گلگت بلتستان اور خیبر پختونخوا کے بعض علاقوں میں گلیشیئر جھیلوں کے پھٹنے سے سیلابی صورتحال کا خطرہ ہے۔ بادسوات، ہنارچی، ترسات، ہندور، درکوٹ، اشکومن، ششپر، ریشون، بریپ، بونی، سردار گول اور ارکاری میں سیلاب اور لینڈ سلائیڈنگ کا خدشہ ہے۔

این ڈی ایم اے نے تمام متعلقہ اداروں کو ممکنہ خطرات سے نمٹنے کے لئے پیشگی تیاریوں کی ہدایت کی ہے۔ عوام سے درخواست کی گئی ہے کہ حساس علاقوں میں غیر ضروری سفر سے گریز کریں اور تیز پانی کے بہاؤ کی صورت میں ندی نالوں، پلوں اور ڈوبی ہوئی سڑکوں سے نہ گزریں۔ مقامی انتظامیہ کو نشیبی علاقوں سے پانی کی نکاسی کے لیے مشینری اور پمپس تیار رکھنے کی ہدایت کی گئی ہے۔عوام سے گزارش ہے کہ موسم اور ممکنہ خطرات کے بارے میں تازہ معلومات کے لئے پاک این ڈی ایم اے کی ڈیزاسٹر الرٹ ایپ سے رہنمائی حاصل کریں۔\932