ایف آئی اے نے 1368 انسانی اسمگلروں کو گرفتار کرلیا

گرفتار ہونے والوں میں یونان کشتی حادثات میں ملوث 91 انسانی اسمگلر بھی شامل ہیں،ترجمان ایف آئی اے

بدھ 30 جولائی 2025 22:00

کراچی(اُردو پوائنٹ اخبارتازہ ترین - این این آئی۔ 30 جولائی2025ء)وفاقی تحقیقاتی ایجنسی (ایف آئی ای)نے رواں مالی سال کے دوران 1368 انسانی اسمگلروں کو گرفتار کرلیا۔تفصیلات کے مطابق ایف آئی اے نے سال 2025 کے دوران اب تک انسانی اسمگلروں کیخلاف کریک ڈان کرتے ہوئے 1368 انسانی اسمگلروں کو گرفتار کرلیا۔ترجمان ایف آئی اے کے مطابق گرفتار ملزمان میں ریڈ بک کے 16 انتہائی مطلوب انسانی اسمگلرز بھی شامل ہیں۔

جن میں یونان کشتی حادثات میں ملوث 91 انسانی اسمگلر بھی شامل ہیں۔ایف آئی اے ترجمان کے مطابق رواں سال کے دوران ایف آئی اے نے انسانی سمگلنگ میں ملوث ملزمان کی 955 ملین روپے سے زائد مالیت کی جائیدادیں ضبط کی۔ انسانی اسمگلنگ میں ملوث عناصر کے زیر استعمال 239 ملین روپے کے بینک اکائونٹس منجمد کیے گئے۔

(جاری ہے)

ترجمان ایف آئی اے کے مطابق انٹرپول کے ذریعے انسانی سمگلنگ میں ملوث ملزمان کی گرفتاری کے لئے ریڈ نوٹسسز جاری کیے گئے۔

کشتی حادثے میں ملوث ایجنٹوں کی گرفتاری کے لئے تمام تر وسائل کو بروئے کار لایا جارہا ہے۔ڈی جی ایف آئی اے رفعت مختار راجہ نے کہا کہ معصوم جانوں سے کھیلنے والوں کو انصاف کے کٹہرے میں لایا جائے گا۔ گرفتار انسانی سمگلروں کو قانون کے مطابق سخت سزائیں دلوائی جائیں گی۔ترجمان کے مطابق معاشرے میں عوامی آگاہی اور تعاون کو عملی جامہ پہناتے ہوئے ہم یہ جنگ جیت سکتے ہیں۔ انسانی سمگلنگ کے خلاف موثر حکمت عملی ایف آئی اے کی اولین ترجیح ہے۔ترجمان ایف آئی اے نے کہاکہ عالمی اداروں کے ساتھ مل کر انسانی سمگلنگ کے خاتمے کے لئے تمام تر اقدامات کئے جا رہے ہیں۔