پی ڈی ایم اے پنجاب ،مون سون فلڈ فیکٹ شیٹ جاری

لاہور (اُردو پوائنٹ اخبارتازہ ترین - اے پی پی۔ 31 جولائی2025ء) وزیر اعلی پنجاب کی ہدایات کے پیشِ نظر پی ڈی ایم اے پنجاب نے مون سون فلڈ کی صورتحال بارے فیکٹ شیٹ جاری کر دی ۔ ترجمان پی ڈی ایم اے کے مطابق گزشتہ 24 گھنٹوں میں فیصل آباد 100 ملی میٹر گجرانوالہ 47 اور جھنگ میں 18 ملی میٹر بارش ریکارڈ کی گئی جبکہ آئندہ 24 گھنٹوں میں لاہور راولپنڈی سمیت پنجاب کے بیشتر اضلاع میں بارشیں متوقع ہیں ۔

ڈی جی پی ڈی ایم اے پنجاب عرفان علی کاٹھیا نے انتظامیہ کو ہدایا ت دیتے ہوئے کہا ہے کہ وہ ہر طرح کی صورت حال سے نمٹنے کے لیے الرٹ رہیں، دریائے چناب میں مرالہ نچلے درجے کا سیلاب جبکہ خانکی اور قادر آباد کے مقام پر درمیانے درجے کا سیلاب ہے ۔دریائے چناب میں پانی کا بہا وگزشتہ روز کی نسبت کم ہوا ہے اوردریائے چناب میں بہاو 2 لاکھ 15 ہزار کیوسک سے کم ہو کر 1 لاکھ 70 ہزار کیوسک ہو گیا ہے ۔

(جاری ہے)

تر جمان کے مطابق دریائے چناب کے پانی میں اضافے کو پی ڈی ایم اے پنجاب 24 گھنٹے مانیٹر کر رہا ہے ۔ ڈی جی نے بتایا کہ پی ڈی ایم اے پنجاب محکمہ آبپاشی ارسا و دیگر متعلقہ محکموں سے مسلسل رابطے میں ہے، دریائے سندھ میں تربیلا، کالا باغ ،چشمہ اور تونسہ کے مقام پر نچلے درجے کا سیلاب ہے جبکہ دریائے جہلم راوی اور ستلج میں پانی کا بہا ونارمل سطح پر ہے۔

دریائے راوی میں جسڑ کے مقام پر 30 ہزار 690 شاہدرہ 14 ہزار بلوکی 32 ہزار جبکہ سدھنائی کے مقام پر پانی کا بہاو 18 ہزار کیوسک تک ہے ۔اس کے ساتھ ساتھ رودکوہیوں اور بڑے دریاوں سے ملحقہ ندی نالوں میں بھی پانی کا بہاونارمل سطح پر ہے۔تربیلا ڈیم میں 87 فیصد جبکہ منگلا ڈیم 58 فیصد تک بھر چکا ہے۔ترجمان کے مطابق بھارتی ڈیمز میں پانی کی سطح 43فیصد تک ہے۔

ڈی جی پی ڈی ایم اے نے شہریوں سے کہا ہے کہ موسم برسات میں احتیاطی تدابیر اختیار کریں۔تر جمان کے مطابق برساتی نالوں میں نہاتے ہوئے ڈوبنے سے 4 خواتین اور 1 بچہ جاں بحق ہوئے جبکہ رواں سال مون سون بارشوں کے باعث اب تک مختلف حادثات میں 162 شہری جاںبحق، 558شہری زخمی ،214 گھر متاثراور121مویشی ہلاک ہوئے ہیں۔ڈی جی پی ڈی ایم اے کے مطابق وزیر اعلی پنجاب کی ہدایات کے پیشِ نظر متاثرہ فیملیز کو مالی معاونت فراہم کی جا رہی ہے ۔