وفاقی محتسب سیکریٹریٹ کے زیر اہتمام ٹنڈوآدم میں کھلی ، متعدد شکایات پر موقع پر کارروائی

جمعرات 31 جولائی 2025 13:50

حیدرآباد (اُردو پوائنٹ اخبارتازہ ترین - اے پی پی۔ 31 جولائی2025ء) وفاقی محتسب اعلیٰ پاکستان اعجاز احمد قریشی کی خصوصی ہدایت پر وفاقی محتسب سیکریٹریٹ ریجنل آفس میرپورخاص کے انچارج انجینئر محمد عارف کی زیر نگرانی ٹنڈوآدم میں کھلی کچہری کا انعقاد کیا گیا، جس میں شہریوں نے مختلف وفاقی اداروں کے خلاف شکایات پیش کیں۔ کھلی کچہری کے دوران حیسکو، سوئی سدرن گیس، نادرا، بینظیر انکم سپورٹ پروگرام اور ریلوے سمیت دیگر وفاقی اداروں کے خلاف شکایات موصول ہوئیں، جن میں سے متعدد پر موقع پر ہی کارروائی کی گئی، جبکہ بعض کیسز میں افسران اور شکایت کنندگان کو دفتر طلب کیا گیا۔

اس موقع پر اے پی پی سے بات چیت کرتے ہوئے انجینئر محمد عارف نے کہا کہ وفاقی محتسب کا ادارہ عوامی مسائل کے فوری حل کے لیے سرگرم ہے اور شہری سادہ کاغذ پر درخواست دے کر اپنی شکایت بلا معاوضہ درج کروا سکتے ہیں۔

(جاری ہے)

انہوں نے مزید بتایا کہ رواں سال اب تک تقریباً 3000 شکایات موصول ہوئی ہیں، جو گزشتہ سال کی نسبت 26 فیصد زیادہ ہیں۔ تقریب میں اسسٹنٹ کمشنر ٹنڈوآدم حنین طارق شاہانی، حیسکو کے آفیسر آصف علی چنہ، سوئی سدرن گیس کے انچارج سید حبدار علی شاہ، ڈی ایس پی عبدالستار گرگیج، نادرا کے انچارج شاہد حسین ہالیپوٹو، بی آئی ایس پی کے اسسٹنٹ ڈائریکٹر فیصل گجر، مختیارکار رحم علی زرداری، وائس چیئرمین میونسپل کمیٹی ملک ذوالفقار، عاشق حسین ساند سمیت دیگر محکموں کے افسران اور شہریوں کی بڑی تعداد نے شرکت کی۔