لاڑکانہ، حاضر سروس ،ریٹائرڈ سرکاری ملازمین کے مسائل بغیر کسی تاخیر کے حل کئے جائیں، علی اکبر جاگیرانی

جمعرات 31 جولائی 2025 17:20

لاڑکانہ (اُردو پوائنٹ اخبارتازہ ترین - اے پی پی۔ 31 جولائی2025ء) صوبائی محتسب اعلیٰ سندھ لاڑکانہ کے ریجنل ڈائریکٹر علی اکبر جاگیرانی نے کہا ہے کہ حاضر سروس اور ریٹائرڈ سرکاری ملازمین کے مسائل بغیر کسی تاخیر کے حل کیے جائیں۔ ان کی تنخواہیں، پنشن، جی پی فنڈ اور دیگر واجبات بروقت ادا کیے جائیں۔ان خیالات کا اظہار انہوں نے ڈسٹرکٹ اکائونٹس آفس لاڑکانہ میں ملازمین کے مسائل کے حوالے سے منعقدہ کھلی کچہری سے خطاب کرتے ہوئے کیا۔

اس موقع پر ڈسٹرکٹ اکائونٹس آفیسر الطاف حسین منگی، اسسٹنٹ اکائو نٹس آفیسر کامران احمد سومرو اور متعلقہ محکمے کے دیگر ملازمین بھی موجود تھے۔ریجنل ڈائریکٹر نے مزید کہا کہ پنشن کے کیسز سے متعلق آپ ہمیں رپورٹ لکھ کر بھیجیں کہ آپ کے پاس کتنے کیسز جمع ہیں اور ان میں سے کتنے حل کئے جا چکے ہیں۔

(جاری ہے)

انہوں نے کہا کہ ملازمین کی جو بھی جائز شکایات ہیں، انہیں قانونی تقاضے پورے کرنے کے بعد فوری طور پر حل کیا جائے اور ان میں کوئی رکاوٹ نہیں آنی چاہیے، خاص طور پر عمر رسیدہ افراد اور پنشنرز کے مسائل ترجیحی بنیادوں پر حل کیے جائیں۔

اس موقع پر ڈسٹرکٹ اکائونٹس آفیسر لاڑکانہ الطاف حسین منگی نے کہا کہ جن ملازمین کی تنخواہیں، پنشن اور دیگر واجبات زیر التوا ہیں، ان کے قانونی تقاضے پورے ہونے چاہئیں تاکہ انہیں بروقت ادائیگیاں کی جا سکیں۔ انہوں نے کہا کہ ہمارے ادارے کے افسران اور دیگر ملازمین ہر وقت ملازمین کے مسائل کے حل کے لیے کام کر رہے ہیں، مگر اس کے لیے ضروری ہے کہ دستاویزات مکمل ہوں۔

اس موقع پر محکمہ تعلیم، پولیس، بیوہ خواتین اور دیگر محکموں کے ریٹائرڈ ملازمین نے اپنے مسائل کے حوالے سے شکایات بھی کیں، جنہیں سننے کے بعد موقع پر ہی احکامات جاری کیے گئے اور ڈسٹرکٹ اکائونٹس آفیسر کو ہدایت دی گئی کہ ان کے مسائل فوراً حل کیے جائیں۔ کھلی کچہری کے دوران تقریباً 12 درخواستیں موصول ہوئیں جن کے حل کے لیے موقع پر احکامات جاری کیے گئے۔