آئی جی پنجاب ڈاکٹر عثمان انور کا صادق آباد میں پولیس چوکی پر کچے کے ڈاکوؤں کے حملے کا نوٹس،آر پی او بہاولپور سے رپورٹ طلب

جمعہ 1 اگست 2025 12:10

رحیم یارخان (اُردو پوائنٹ اخبارتازہ ترین - اے پی پی۔ 01 اگست2025ء) آئی جی پنجاب ڈاکٹر عثمان انور نے صادق آباد میں شیخانی پولیس چوکی پر کچے کے ڈاکوؤں کے حملے کا نوٹس لیتے ہوئے آر پی او بہاولپور سے رپورٹ طلب کر لی۔ترجمان پولیس کے مطابق آئی جی پنجاب نے ڈی پی او رحیم یار خان کو حملے میں ملوث ڈاکوؤں کی فوری گرفتاری کا حکم دیا ہے۔

(جاری ہے)

آئی جی پنجاب نے شہریوں کی جان و مال کی حفاظت کے دوران شہادت کا رتبہ پانے والے ایلیٹ فورس کے اہلکاروں کی عظیم قربانی پر انہیں خراج عقیدت پیش کیا اور کہا کہ ڈاکوؤں نے رات کی تاریکی کا فائدہ اٹھا کر چھپ کر بزدلانہ حملہ کیا، بزدلانہ کاروائیاں جانیں قربان کرنے والی پولیس فورس کے حوصلے پست نہیں کر سکتیں۔

انہوں نے کہا کہ کچا کے ڈاکوؤں کے خلاف پولیس آپریشن بھرپور طاقت سے جاری رہے گا، جوانوں کا خون رائیگاں نہیں جانے دیں گے ۔ یاد رہے کہ پولیس چوکی پر ڈاکوئوں کے حملے میں ایلیٹ فورس کے 5 اہلکار شہید ہو گئے جن میں محمد عرفان، محمد سلیم اور نخیل کا تعلق بہاولنگر جبکہ خلیل اور غضنفر کا تعلق رحیم یار خان سے ہے۔