پاکستان ریلویز اور حکومت پنجاب کا باہمی اشتراک سے گرین کوریڈور منصوبہ شروع کرنے کا فیصلہ

جمعہ 1 اگست 2025 15:48

اسلام آباد (اُردو پوائنٹ اخبارتازہ ترین - اے پی پی۔ 01 اگست2025ء) پاکستان ریلویز اور حکومت پنجاب نے باہمی اشتراک سے گرین کوریڈور منصوبہ شروع کرنے کا فیصلہ کیا ہے، 40 کلومیٹر طویل 700 گرین بیلٹس بنائی جائیں گی۔پاکستان ریلویز کے مطابق شاہدرہ سے رائیونڈ کے درمیان ریلوے ٹریک سے منسلک ایریا کو گرین بیلٹس میں تبدیل کیا جائے گا۔2.25 ارب روپے سے زائد لاگت کا گرین کوریڈور منصوبہ ایک سال میں مکمل کیا جائے گا۔

اس کے علاوہ ریلوے کی پرانی بوگیوں میں لائبریریاں اور کیفیز بھی بنائے جائیں گے۔

(جاری ہے)

ریلوے حکام کے مطابق یہ منصوبہ چار مراحل پر مشتمل ہے، منصوبہ کے پہلے مرحلہ میں شاہدرہ سے لاہور ریلوے سٹیشن جبکہ دوسرے مرحلہ میں والٹن تک کام مکمل کیا جائےگا۔اسی طرح تیسرے مرحلہ میں والٹن سے کوٹ لکھپت جبکہ چوتھے مرحلہ میں رائیونڈ تک منصوبہ مکمل کیا جائے گا۔واضح رہے کہ محکمہ ہائوسنگ پنجاب نے منصوبے کا PC-1 محکمہ پلاننگ اینڈ ڈویلپمنٹ کو بھجوا دیا ہے۔منصوبے سے ماحولیاتی آلودگی کی کمی میں بھی مدد ملے گی۔وفاقی وزیر ریلوے محمد حنیف عباسی نے اس منصوبہ کیلئے پاکستان ریلوے سے تعاون پر وزیر اعلیٰ پنجاب سے اظہار تشکر کیا ہے۔