ورلڈ چیمپئن شپ آف لیجنڈز، سیمی فائنل میں جنوبی افریقا نے آسٹریلیا کو ہرا دیا

جمعہ 1 اگست 2025 18:37

لندن (اُردو پوائنٹ اخبارتازہ ترین - این این آئی۔ 01 اگست2025ء)ورلڈ چیمپئن شپ آف لیجنڈز کے دوسرے سیمی فائنل میں جنوبی افریقا چیمپئنز نے آسٹریلیا چیمپئنز کو سنسنی خیز مقابلے کے بعد ایک رن سے شکست دے کر فائنل کیلئے کوالیفائی کرلیا۔ انگلینڈ میں جاری ورلڈ چیمپئن شپ آف لیجنڈز کے دوسرے سیمی فائنل میں جنوبی افریقا چیمپئنز نے آسٹریلیا چیمپئنز کے خلاف ٹاس جیت کر پہلے بیٹنگ کا فیصلہ کیا۔

جنوبی افریقا چیمپئنز نے مقررہ 20 اوورز میں 8 وکٹوں کے نقصان پر 186رنز اسکور کیے، مورنی وین ویک 76 رنز کے ساتھ نمایاں رہے، اسٹمس نے 57 رنز کی اننگز کھیلی۔

(جاری ہے)

187 رنز کیہدف کے جواب میں آسٹریلیا چیمپئنز نے ڈٹ کر مقابلہ کیا لیکن صرف ایک رن سے شکست کھا بیٹھے۔ہدف کے تعاقب میں آسٹریلیا چیمپئنز نے 7 وکٹوں کے نقصان پر 185 رنز بنائے، ڈینیئل کرسچن 49 رنز کے ساتھ نمایاں رہے۔

آسٹریلیا چیمپئنز کے خلاف ایک رن سے کامیابی کے ساتھ جنوبی افریقا چیمپئنز نے ایونٹ کے فائنل کے لیے کوالیفائی کرلیا جہاں ہفتے کو اس کا مقابلہ پاکستان چیمپئنز سے ہوگا۔واضح رہے کہ ورلڈ چیمپئن شپ آف لیجنڈز کے پہلے سیمی فائنل میں بھارت نے پاکستان کے ساتھ کھیلنے سے انکار کر دیا تھا جس کے بعد پاکستان چیمپئنز نے فائنل کیلئے کوالیفائی کرلیا تھا۔