5 اگست کو یومِ استحصال منانے کے سلسلے میں لورالائی شہر کو بینرز سے سجا دیا گیا

جمعہ 1 اگست 2025 21:30

کوئٹہ (اُردو پوائنٹ اخبارتازہ ترین - اے پی پی۔ 01 اگست2025ء) چیئرمین ضلع کونسل اصغر خان اتمانخیل کے حکم پر منگل 5 اگست کو یومِ استحصال منانے کے سلسلے میں پورے لورالائی شہر کو بینرز سے سجا دیا گیا ہے جس پر یوم استحصال کشمیر کے حوالے سے مختلف نعرے درج ہیں ۔ اس موقع اصغر خان اوتمانخیل نے تمام متعلقہ محکموں کو ہدایت کی کہ دن کو مؤثر طور پر منانے کے لیے ہم آہنگی کے ساتھ کام کریں۔

اس موقع پر اصغرخان اوتمانخیل نے لورالائی پریس کلب کے میاں محمدعامربشیر آرائیں اور محکمہ انفارمیشن کے محمود بلوچ سے خصوصی بات چیت کرتے ہوئے کہا کہ کشمیری عوام کی آواز پوری دنیا تک پہنچائی جائے گی اور پاکستانی قوم مقبوضہ جموں و کشمیر کے مسئلے کے منصفانہ حل کے لیے اپنی جدوجہد جاری رکھے گی۔

(جاری ہے)

انہوں نے تمام متعلقہ اداروں سے اپیل کی ہے کہ وہ یومِ استحصال کو مؤثر انداز میں منانے کے لیے باہمی ہم آہنگی کے ساتھ کام کریں اور عوام کی زیادہ سے زیادہ شمولیت کو یقینی بنائیں۔

انہوں نے کہا کہ 5 اگست 2019 ءکے بعد بھارت کے اقدامات بین الاقوامی قوانین، کشمیری عوام کی خواہشات اور اقوامِ متحدہ کی سلامتی کونسل کی قراردادوں کی مکمل خلاف ورزی ہیں۔انہوں نے کہا کہ اس سال یومِ استحصال کی اہمیت پاکستان کی بنیان مرصوص میں کامیابی کی وجہ سے کئی گنا بڑھ گئی ہے۔اصغرخان اوتمانخیل نے کہا کہ پاکستان بہادر کشمیری عوام کے ساتھ اظہارِ یکجہتی میں کھڑا ہے، جو بھارتی قابض افواج کے ظلم و ستم، امتیازی سلوک اور ناانصافی کے باوجود پاکستان سے الحاق کے اپنے خواب کی تکمیل کے لیے تاریخی جدوجہد کر رہے ہیں۔