سرگودھا ،اپنا گھر اپنی چھت پروگرام کے تحت 5ہزار 549مکانات زیر تعمیر ، 539مکمل

ہفتہ 2 اگست 2025 16:24

سرگودھا(اُردو پوائنٹ اخبارتازہ ترین - این این آئی۔ 02 اگست2025ء)سرگودھا ڈویژن میں اپنا گھر اپنی چھت پروگرام کے تحت 5ہزار 549مکانات زیر تعمیر اور 539مکمل کر لئے گے۔جبکہ اپنی زمین اپنا گھر کے تحت سرگودھا، خوشاب اور بھکر میں 104پلاٹس مفت تقسیم کیے جائیں گے۔ذرائع کے مطابق وزیراعلیٰ پنجاب مریم نواز شریف کے پروگرام اپنا گھر اپنی چھت میں سرگودھا ڈویژن میں 5ہزار 549مکانات کی تعمیر میں سرگودھا کے 1,363،خوشاب کے 1,435، میانوالی کے 1,348اور بھکر کے 1,403مکانات زیر تعمیر ہیں۔

کمشنرجہانزیب اعوان کی زیر صدارت اجلاس میں بتایا گیا کہ "اپنا گھر اپنی چھت"کے تحت اب تک 539 مکانات مکمل ہوچکے ہیں جن میں سرگودہا کے 152، خوشاب کے 176، میاںوالی کے 104 اور بھکر کے 107 مکانات ہیں۔ جبکہ دیہی علاقوں میں ایک سے دس مرلے تک کے پلاٹوں کے مالکان کو 15 لاکھ روپے تک قرضِ حسنہ فراہم کیا جا رہا ہے، جو 14 ہزار روپے ماہانہ قسطوں میں 9 سال کے دوران واپس لیا جائے گا۔

(جاری ہے)

جبکہ عوام دوست پروگرام اپنی زمین اپنا گھرسکیم کے تحت مستحقین میں مفت پلاٹ تقسیم میں بتایا گیا کہ اپنی زمین اپنا گھر کے لیے درخواستوں کی وصولی مکمل ہو چکی ہے جبکہ پڑتال کا عمل جاری ہے۔ اس سکیم کے تحت ضلع سرگودہا میں تین مرلہ کے 25 پلاٹس ،خوشاب میں پانچ مرلہ کے 24 پلاٹس اور بھکر میں پانچ مرلہ کے 55 پلاٹس مستحق میں بذریعہ قرعہ اندازی مفت تقسیم کیے جائیں گے۔