میڈیکل کالجزمیں جدید آرٹیفشل انٹیلی جنس اینڈ ریسرچ لیبزقائم کررہے ہیں‘ خواجہ سلمان رفیق

لاہور (اُردو پوائنٹ اخبارتازہ ترین - این این آئی۔ 02 اگست2025ء) صوبائی وزیر صحت خواجہ سلمان رفیق نے کنگ ایڈورڈ میڈیکل یونیورسٹی میں نیشنل ریسرچ اینڈ اینوویشن کانفرنس 2025 میں بطور مہمان خصوصی شرکت کی ۔اس موقع پر وائس چانسلر کنگ ایڈورڈ میڈیکل یونیورسٹی پروفیسر محمود ایاز، وائس چانسلر فاطمہ جناح میڈیکل یونیورسٹی پروفیسر خالد مسعود گوندل، سی ای او میو ہسپتال پروفیسر ہارون حامد، پروفیسر اصغر نقی، پروفیسر محمد معین، پروفیسر ابرار اشرف، پروفیسر فائزہ بشیر، پروفیسر علی مدیح ہاشمی اور پروفیسر عمران حسن خان سمیت فیکلٹی ممبران اور طلباء و طالبات کی کثیر تعداد نے شرکت کی۔

صوبائی وزیر نے مختلف طبی سٹالز کا دورہ کیا اور طلباء و طالبات کی کاوش کو سراہا۔صوبائی وزیر صحت خواجہ سلمان رفیق نے کانفرنس کے موقع پر شرکاء سے خطاب کرتے ہوئے کہاکہ انتہائی خوبصورت اور علمی کانفرنس میں شرکت پر خوشی محسوس ہو رہی ہے۔

(جاری ہے)

ایسی کانفرنسز جدت، تحقیق اور ٹیکنالوجی کی جانب حکومت پنجاب کی ترجیحات کی نشاندہی کرتی ہیں۔ آج ہم آرٹیفشل انٹیلی جنس اور طبی سائنس کی دنیا میں زندگی گزار رہے ہیں۔

آج بتانا چاہتا ہوں کہ حکومت پنجاب نے شعبہ صحت کی بہتری کو اپنی اولین ترجیح بنایا ہوا ہے۔ وزیر اعلیٰ مریم نواز شریف کی قیادت میں حکومت پنجاب نے چیف منسٹرز چلڈرن ہارٹ سرجری پروگرام، چیف منسٹرز ڈائیلسز پروگرام، چیف منسٹرز سپیشل انشی ایٹو فار ٹرانسپلانٹ پروگرام، کلینک آن ویلز اور فیلڈ ہاسپٹلز جیسے تاریخی منصوبے لانچ کئے ہیں۔

سٹروک مینجمنٹ کیلئے اقدامات اور ہسپتالوں کی اپ گریڈیشن و رینوویشن کا کریڈٹ بھی حکومت پنجاب کو جاتا ہے۔ خواجہ سلمان رفیق نے کہاکہ حکومت پنجاب نواز شریف انسٹی ٹیوٹ آف کینسر ٹریٹمنٹ اینڈ ریسرچ، نواز شریف انسٹی ٹیوٹ آف کارڈیالوجی لاہور اور نواز شریف انسٹی ٹیوٹ آف کارڈیالوجی سرگودھا جیسے اسٹیٹ آف دی آرٹ ادارے قائم کر رہی ہے۔

ہم انڈر گریجویٹ میڈیکل کالجز میں آرٹیفشل انٹیلی جنس کی تعلیم فراہم، ہیلتھ ڈیٹا مینجمنٹ اور ریسرچ پر مبنی کورسز کروا رہے ہیں۔ ہم پنجاب کو سمارٹ ہاسپٹلز، ٹیلی میڈیسن سروسز، آرٹیفشل انٹیلی جنس اور ایوی ڈینس بیسڈ کلینیکل پریکٹسز کے ساتھ ہیلتھ کیئر اینو ویشن کا ایک مرکز بنانا چاہتے ہیں۔ ہم میڈیکل کالجز میں جدید آرٹیفشل انٹیلی جنس اینڈ ریسرچ لیبز قائم کر رہے ہیں۔

حکومت پنجاب صوبہ بھر میں طبی ریسرچ فیلو شپس کو فروغ دے رہی ہے۔وائس چانسلر کنگ ایڈورڈ میڈیکل یونیورسٹی پروفیسر محمود ایاز نے اظہار خیال کرتے ہوئے کہاکہکانفرنس میں آمد پر صوبائی وزیر صحت خواجہ سلمان رفیق کا شکریہ ادا کرتے ہیں۔ ہمیں دکھی انسانیت کی خدمت کر کے اپنے خدا کو راضی کرنا ہے۔کنگ ایڈورڈ میڈیکل یونیورسٹی نے اپنی کیو ایس رینکنگ کو بہتر بنایا ہے۔

وائس چانسلر فاطمہ جناح میڈیکل یونیورسٹی پروفیسر خالد مسعود گوندل نیاظہار خیال کرتے ہوئے بتایاکہ پنجاب کی طبی درسگاہوں سے فارغ التحصیل طلباء و طالبات پوری دنیا میں پاکستان کا نام روشن کر رہے ہیں۔انتہائی اہم موضوع پر کانفرنس کے انعقاد پر پروفیسر محمود ایاز اور ان کی ٹیم کو مبارکباد پیش کرتا ہوں۔صوبائی وزیر صحت خواجہ سلمان رفیق نے کانفرنس کے اختتام پر مختلف علمی مقابلوں میں نمایاں طلباء و طالبات میں نقد انعام، گولڈ میڈلز و تعریفی اسناد بھی تقسیم کیں۔