پرائس کنٹرول ڈیپارٹمنٹ کی تین ہزار کے قریب دکانداروں کیخلاف چینی قیمتوں میں ناجائز منافع خوری پر کارروائیاں

ہفتہ 2 اگست 2025 23:40

لاہور (اُردو پوائنٹ اخبارتازہ ترین - اے پی پی۔ 02 اگست2025ء) چینی کے مقررہ نرخوں پر عملدرآمد نہ کرنیوالوں کیخلاف کریک ڈائون جاری ہے۔

(جاری ہے)

ترجمان پرائس کنٹرول اینڈ کماڈیٹیز مینجمنٹ ڈیپارٹمنٹ کے مطابق گزشتہ 24 گھنٹوں کے دوران صوبہ بھر میں 2814 دکانداروں کیخلاف چینی کی قیمتوں میں ناجائز منافع خوری پر کارروائیاں کی گئیں، پنجاب بھر میں 149 افراد گرفتار،27 کیخلاف مقدمات درج اور 2ہزار 665 افراد کو جرمانے عائد کیے گئے ہیں،اب تک 23 ہزار 133 افراد کیخلاف کارروائیوں میں 1555 افراد گرفتار جبکہ 238 کیخلاف مقدمات درج کروائے گئے ہیں،لاہور ڈویژن میں 157 گراں فروشوں کیخلاف کارروائیاں،02 گرفتاراور03 کیخلاف مقدمات درج کروائے گئے ہیں،اسی طرح گوجرانولہ ڈویژن میں 1144 اور فیصل آباد میں 983 دکانداروں کیخلاف چینی کے نرخوں کی خلاف ورزی پر کارروائیاں کی گئیں، ساہیوال ڈویژن میں 21، سرگودھا 36 ، راولپنڈی167، بہاولپور ڈویژن میں 87,،ڈی جی خان 100 اور ملتان میں 119 چینی گراں فروشوں کیخلاف کارروائیاں کی گئیں،ترجمان پرائس کنٹرول کا مزید کہنا تھا کہ چینی کی قیمتوں میں مصنوعی اضافے اور قلت پیدا کرنیوالوں کو گرفتار اور بھاری جرمانے عائد کیے جارہے ہیں جس سے عام مارکیٹ میں چینی کی سپلائی میں واضح بہتری آئی ہے۔