ضلعی انتظامیہ کی جانب سے چینی کی دستیابی، قیمتوں پر عملدرآمد اور عوامی ریلیف کو یقینی بنانے کے لیے مؤثر اقدامات جاری

سرگودھا (اُردو پوائنٹ اخبارتازہ ترین - اے پی پی۔ 03 اگست2025ء) ضلعی انتظامیہ کی جانب سے چینی کی دستیابی، قیمتوں پر عملدرآمد اور عوامی ریلیف کو یقینی بنانے کے لیے مؤثر اقدامات جاری ہیں۔ ڈپٹی کمشنر سرگودہا کیپٹن (ر) محمد وسیم کی خصوصی ہدایت پر شوگر ملز سے بڑے پیمانے پر چینی کی ریلیز کی گئی ہے تاکہ مارکیٹ میں وافر مقدار میں چینی کی موجودگی برقرار رہے اور کسی بھی قسم کی قلت یا قیمتوں میں اضافہ نہ ہو۔

گذشتہ روز سرگودہا کی چاروں شوگر ملز کی جانب سے مجموعی طور پر 53 ہزار میٹرک ٹن چینی جاری کی گئی۔ نون شوگر ملز نے 19 ہزار میٹرک ٹن، یونیکول شوگر مل نے 12 ہزار میٹرک ٹن، ایس ڈبلیو شوگر مل نے 12 ہزار میٹرک ٹن جبکہ العربیہ شوگر مل نے 10 ہزار میٹرک ٹن چینی ریلیز کی۔ تمام شوگر ملز پر وافر مقدار میں اسٹاک دستیاب ہے اور روزانہ کی بنیاد پر فراہمی جاری ہے۔

(جاری ہے)

ضلعی انتظامیہ نے واضح کیا ہے کہ تمام ملز سے چینی 165 روپے فی کلو ایکس مل پرائس پر فراہم کی جا رہی ہے جبکہ شہر اور گردونواح میں 173 روپے فی کلو ریٹیل پرائس پر چینی باآسانی دستیاب ہے۔ عوام سے اپیل کی گئی ہے کہ وہ کسی بھی افواہ یا خوف کا شکار نہ ہوں، چینی کی دستیابی مکمل طور پر یقینی بنائی گئی ہے۔ شہری اپنی ضرورت کے مطابق چینی خریدیں، بلا ضرورت ذخیرہ اندوزی سے گریز کریں تاکہ تمام افراد کو مقررہ نرخوں پر چینی میسر آ سکے۔

ڈپٹی کمشنر کی ہدایت پر ہول سیلرز اور ریٹیلرز کی مانیٹرنگ بھی سخت کر دی گئی ہے۔ گذشتہ روز پرائس کنٹرول مجسٹریٹس نے چینی کی زائد قیمت وصول کرنے والوں کے خلاف بھرپور کارروائی کی، 13 شکایات پر ایکشن لیا گیا، 12 ریٹیلرز اور ایک ہول سیلر کے خلاف کارروائی کی گئی، ایک دکاندار کو گرفتار کیا گیا جبکہ مجموعی طور پر ایک لاکھ 20 ہزار روپے جرمانہ عائد کیا گیا۔

ڈپٹی کمشنر نے اتوار کے روز بھی پرائس کنٹرول مجسٹریٹس کو فیلڈ میں رہنے، چینی سمیت دیگر اشیائے ضروریہ کی قیمتوں پر سختی سے عملدرآمد یقینی بنانے، اور خلاف ورزی پر فوری گرفتاری، بھاری جرمانہ اور ایف آئی آر درج کرنےکی ہدایت کی ہے۔انتظامیہ شہریوں سے اپیل کرتی ہے کہ اگر کہیں زائد قیمت، ذخیرہ اندوزی یا مصنوعی قلت کی شکایت ہو تو فوری طور پر اطلاع دیں تاکہ فوری اور مؤثر کارروائی عمل میں لائی جا سکے۔