اسلام آباد اولمپک ایسوسی ایشن کی ایگزیکٹو کمیٹی کا اجلاس،یوتھ گیمز، نیشنل گیمز میں بھرپور شرکت کرنیکا فیصلہ

اتوار 3 اگست 2025 18:50

اسلام آباد (اُردو پوائنٹ اخبارتازہ ترین - این این آئی۔ 03 اگست2025ء)اسلام آباد اولمپک ایسوسی ایشن نے پہلی یوتھ گیمز سمیت نیشنل گیمز میں بھرپور شرکت کرنے کا فیصلہ کرلیا۔ اسلام آباد اولمپک ایسوسی ایشن کی ایگزیکٹو کمیٹی کا اہم اجلاس بیگم عشرت اشرف کی صدارت میں ہوا جس میں سیکریٹری جنرل رضوان الحق رازی سمیت ایگزیکٹو کمیٹی کے دیگراراکین نے شرکت کی۔

اجلاس میں اسلام آباد اولمپک سے منسلک کھیلوں کی تنظیموں کی باقاعدہ حیثیت اور ان کے کردار کو مؤثر بنانے پر تفصیلی غور کیا گیاجبکہ اسلام آباد اولمپک ایسوسی ایشن کیساتھ الحاق دیگر سپورٹس ایسوسی ایشنز کی اسلام آباد اسپورٹس بورڈ کے ساتھ رجسٹریشن کے معاملے کا جائزہ لیا گیا تاکہ وفاقی دارالحکومت میں کھیلوں کی مرکزی تنظیم کی حیثیت کو باضابطہ شکل دی جا سکے۔

(جاری ہے)

اجلاس میں اسلام آباد میں ہونیوالی پہلی نیشنل یوتھ گیمز اور کراچی میں کھیلی جانیوالی نیشنل گیمز میں اسلام آباد کی بھرپور شرکت سمیت مضبوط ٹیموں کے انتخاب، تربیت اور دیگر انتظامات سے متعلق حکمت عملی پر تبادلہ خیال کیا۔اس موقع پر صدر بیگم عشرت اشرف نے کہا کہ اسلام آباد کو قومی کھیلوں کے میدان میں نمایاں مقام دلانے کے لیے مشترکہ کوششیں ضروری ہیں۔ انہوں نے کھلاڑیوں اور آفیشلز کو ہر ممکن سہولت فراہم کرنے کی یقین دہانی بھی کرائی۔