پی ایچ ایف نے پرولیگ میں شرکت کے فیصلے کیلئے وقت مانگ لیا

پرولیگ کے حوالے سے حکومت سے بات چیت جاری ہے جلد اچھی خبر آ ئے گی، طارق بگٹی کی گفتگو

پیر 4 اگست 2025 22:52

پی ایچ ایف نے پرولیگ میں شرکت کے فیصلے کیلئے وقت مانگ لیا

لاہور (اُردو پوائنٹ اخبارتازہ ترین - این این آئی۔ 04 اگست2025ء)صدر پاکستان ہاکی فیڈریشن طارق بگٹی نے کہا ہے کہ پاکستان ہاکی فیڈریشن نے ایف آئی ایچ سے پرو لیگ میں شرکت کے فیصلے کے لیے وقت مانگ لیا ہے۔ میڈیا سے گفتگو کرتے ہوئے انھوں نے کہا کہ پرولیگ کے حوالے سے حکومت سے بات چیت جاری ہے جلد اچھی خبر آ ئے گی۔ طارق بگٹی نے کہا کہ ایف آئی ایچ نے 12 اگست تک بتانے کی ڈیڈ لائن دی تھی 20 اگست تک ڈیڈ لائن بڑھانے کی درخواست کی ہے۔

انھوں نے کہا کہ پرو ہاکی لیگ میں شرکت سے کھلاڑیوں کو ایکسپوڑر ملے گا ٹیم کی رینکنگ بہتر ہو گی، پرو ہاکی لیگ کے لیے 35 کروڑ روپے کا بجٹ بنا کر بھیجا ہے۔طارق بگٹی نے کہا پرو ہاکی لیگ سمیت سال بھر کے دیگر ایونٹس کے لیے 70 کروڑ روپے درکار ہوں گے، ایشیا کپ کے لیے بھارت جانے کا فیصلہ حکومت کو کرنا یے، حکومت پاکستان جو فیصلہ کرے گی ہم اس کے مطابق چلیں گے۔

(جاری ہے)

انھوں نے کہا کہ بھارت کی جانب سے اس وقت بہت چیزیں چل رہی ہیں، انگلینڈ میں جو رویہ دکھایا گیا وہ مثبت نہیں ہے۔ وقت کم ضرور ہے لیکن ہمارے کھلاڑی پریکٹس میں ہیں۔ طارق بگٹی نے کہا کہ ہمارے بھارت میں کھیلنے کے حوالے سے خدشات پائے جاتے ہیں، ہم چاہتے ہیں کہ پہلے ہمارا وفد بھارت جائے اور وہ وہاں کے حالات دیکھے اور پھر ہم کوئی فیصلہ کریں۔

انہوںنے کہاکہ کرکٹ میں نیوٹرل وینیو کی مثال ہے لیکن ہاکی میں ایسا نہیں ہے، ہم اپنے تحفظات کے حوالے سے اے ایچ ایف کو آگاہ کر رہے ہیں، ہم بھارتی میڈیا سے پاکستان ٹیم کو ملنے والی دھمکیوں کا سن رہے ہیں۔ طارق بگٹی نے کہا کہ صدر و سیکریٹری کے اختلافات تو ہم پہلے دن سے سن رہے ہیں ہم میں سے کوئی کہیں نہیں جا رہا، ہم ہر ایونٹ کے فائنل میں پہنچ رہے ہیں اور ایونٹ میں جا رہے ہیں۔ کچھ لوگ اب بھی باتیں کر رہے ہیں کہ پرو لیگ میں جانا پیسے کا ضیاع ہے۔ انھوں نے کہا کہ کھلاڑیوں کے اکاؤنٹس میں پیسے جانا شروع ہو گئے ہیں پہلے مرحلے میں لوکل ڈیلیز دی جا رہی ہیں، کھلاڑیوں کو اپنی مجبوریوں کا بتایا ہے جو انہوں نے تسلیم کی ہیں۔