اوول ٹیسٹ،بھارت نے انگلینڈ کو 6 رنز سے ہرا کر سیریز برابر کر دی

پیر 4 اگست 2025 22:49

اوول (اُردو پوائنٹ اخبارتازہ ترین - این این آئی۔ 04 اگست2025ء)بھارت نے انگلینڈ کو اوول میں ہونے والے پانچویں اور آخری ٹیسٹ میچ میں چھ رنز سے شکست دے کر اینڈرسن ٹنڈولکر ٹرافی سیریز دو، دو سے برابر کرلی۔اوول ٹیسٹ کے آخری روز انگلینڈ کو 374 رنز کے ہدف کو عبور کرنے کے لیے مزید 35 رنز درکار تھے اور اس کی چار وکٹیں باقی تھیں۔ بتدا میں جمی اوورٹن نے دو چوکے لگا کر انگلینڈ کو دن کا اچھا آغاز فراہم کیالیکن دوسرے ہی اوور میں جیمی اسمتھ، محمد سراج کا شکار ہوگئے۔

(جاری ہے)

کچھ ہی دیر بعد سراج نے جمی اوورٹن کو بھی واپس پویلین بھیج دیا، جوش ٹنگ بغیر کوئی رن بنائے چلتے بنے۔میچ کے دوران انجرڈ ہوجانے والے کرس ووکس زخمی ہاتھ کے ساتھ بیٹنگ کے لیے آئے، دوسرے اینڈ سے گس ایٹکنسن نے مزاحمت جاری رکھی لیکن وہ چھ رنز قبل ہمت ہار گئے، انہیں بھی محمد سراج نے آئوٹ کیا۔اس طرح انگلینڈ کی پوری ٹیم 367 رنز بناکر آئوٹ ہوگئی اور میچ بھارت نے 6 رنز سے جیت گیا۔ انگلش ٹیم کے ہیری بروک 111 اور جو روٹ 105 رنز بنائے۔ بھارت کے محمد سراج نے 5 اور پراسدھ کرشنا نے 4 کھلاڑیوں کو آئوٹ کیا، اس طرح بھارت اور انگلینڈ کے درمیان سیریز دو، دو سے برابر رہی۔