ہم ٹی ٹونٹی ورلڈ کپ کو مدنظر رکھ کر سیریز کھیل رہے ہیں : سلمان علی آغا

بنگلہ دیش کیخلاف ہوم اور اوے سیریز، اب ویسٹ انڈیز پھر ٹرائی نیشن اور ایشیا کپ یہ تمام سیریز ورلڈ کپ کو دیکھ کر کھیل رہے ہیں، ہمارا گول یہی ہے کہ ورلڈ کپ کیسے جیتنا ہے : ٹی ٹونٹی کپتان

ذیشان مہتاب پیر 4 اگست 2025 12:19

ہم ٹی ٹونٹی ورلڈ کپ کو مدنظر رکھ کر سیریز کھیل رہے ہیں : سلمان علی آغا

لاہور (اردو پوائنٹ تازہ ترین اخبار ۔ 4 اگست 2025ء ) ویسٹ انڈیز کے خلاف تین میچز پر مشتمل سیریز میں 2-1 سے کامیابی حاصل کرنے کے بعد پاکستان ٹیم کے کپتان سلمان علی آغا نے کہا کہ ہم نے جتنی بھی سیریز کھیلی ہیں یا آگے کھیلنی ہیں وہ تمام ورلڈ کپ کو مدنظر رکھ کر کھیل رہے ہیں۔

لاؤڈر ہل میں میڈیا سے گفتگو کرتے ہوئے سلمان علی آغا نے کہا کہ بنگلہ دیش کے خلاف ہوم اور اوے سیریز اب ویسٹ انڈیز پھر ٹرائی نیشن اور ایشیا کپ یہ تمام سیریز ورلڈ کپ کو دیکھ کر کھیل رہے ہیں اور ہمارا گول یہی ہے کہ ورلڈ کپ کو کیسے جیتنا ہے۔

سلمان علی آغا نے کہا کہ دبئی کی کنڈیشنز کافی مختلف ہیں اور ان کنڈیشنز کے بعد جب دبئی جائیں گے تو ہمیں اس کا کافی فائدہ ہوگا، کہہ سکتے ہیں کہ پہلے دو میچز سے آج کی پچ بہتر تھی۔

(جاری ہے)

سلمان علی آغا نے بتایا کہ میں نے آج بالنگ کرنے کا سوچا تھا مگر دو بائیں ہاتھ کے بیٹرز کھیل رہے تھے اور ایک اینڈ سے صائم ایوب کر رہا تھا، دیکھنا ہوتا ہے کہ دونوں طرف سے پریشر کیسے بنا سکتے ہیں۔

انہوں نے کہا کہ اس سیریز میں صائم ایوب اچھی بالنگ کر رہا تھا دوسری طرف پریشر بڑھانے کے لیے صفیان مقیم سے بھی بالنگ کروانی تھی مگر آگے آپ مجھے بالنگ کرتے ہوئے دیکھیں گے۔

کپتان سلمان علی آغا نے کہا کہ ہم نے سوچا تھا کہ اگر 160 یا 170 کرتے ہیں تو ڈیفینڈ کر لیں گے مگر جس طرح سے اوپنرز نے آغاز دیا اور ایسا اسٹارٹ ملے تو آپ 180 یا 190 کر لیتے ہیں۔

اپنی بات کو جاری رکھتے ہوئے سلمان علی آغا نے کہا کہ صاحبزادہ فرحان اور صائم ایوب اچھا اسٹارٹ دے رہے ہیں اور دونوں کے لیے خوشی ہے اور میں امید کرتا ہوں کہ دونوں آگے بھی ایسی پرفارم کرتے رہیں گے۔

انہوں نے کہا کہ اندازہ تھا کہ پاور پلے میں جب گیند پرانا ہوگا تو جتنا بھی اچھا پچ ہو گیند گرپ ضرور کرے گا اور وہی ہوا، ڈیتھ اوورز میں حارث اور صفیان نے جس طرح سے بالنگ کی انہیں کریڈٹ دینا چاہیے۔