لاہور ہائیکورٹ نے عارف والا کے شہری کی مبینہ جعلی پولیس مقابلے میں ہلاکت کی درخواست ڈائریکٹر ایف آئی اے کو بھجوادی

پیر 4 اگست 2025 16:56

لاہور (اُردو پوائنٹ اخبارتازہ ترین - اے پی پی۔ 04 اگست2025ء) لاہور ہائیکورٹ نے عارف والا کے شہری کی مبینہ جعلی پولیس مقابلے میں ہلاکت کے خلاف دائر درخواست دادرسی کے لیے ڈائریکٹر ایف آئی اے کو بھجوادی ۔چیف جسٹس لاہور ہائیکورٹ جسٹس مس عالیہ نیلم نے کوثر پروین کی درخواست نمٹانے کا تحریری حکم جاری کردیا عدالتی حکم میں کہا گیا ہے کہ درخواست گذار کے مطابق ان کے پانچ بیٹوں کو عارف والا پولیس نے اٹھایا ۔

(جاری ہے)

تین بیٹوں کو جوڈیشل ریمانڈ پر جیل بھیج دیا گیا جبکہ دو بیٹوں عمر دراز اور کم سن دلدار کو وہاڑی پولیس کے حوالے کر دیا ۔درخواست گذار نے گرفتاریوں کے خلاف عدالت سے رجوع کیا۔عدالت میں ایس ایچ اونے یقین دلایا کہ کسی کو جعلی پولیس مقابلے میں نہیں مارا جائے گا۔ عدالت میں یقین دہانی کے باوجود عمر دراز کو جعلی پولیس مقابلے میں مار دیا گیا۔ عدلت اس ہلاکت پر ذمہ دار وں کے خلاف ٹارچر اینڈ کسٹوڈیل ڈیٹھ ایکٹ 2022 کے تحت مقدمات درج کرنے کا حکم دے ۔عدالت نے ڈائریکٹر ایف آئی اے کو درخواست پر قانون کے مطابق فیصلہ کرنے کے احکامات جاری کیے۔