صوبائی ورکنگ پارٹی اجلاس میں مختلف سیکٹرز کی ترقیاتی سکیموں کیلئے 52ارب 58کروڑ روپے کی منظوری

پیر 4 اگست 2025 17:57

لاہور (اُردو پوائنٹ اخبارتازہ ترین - اے پی پی۔ 04 اگست2025ء) پنجاب پلاننگ اینڈ ڈویلپمنٹ بورڈ نے مالی سال 2025-26 کے صوبائی ڈویلپمنٹ ورکنگ پارٹی کے 15ویں اجلاس میں مختلف ترقیاتی سیکٹرز کی 8ترقیاتی سکیموں کے لیے مجموعی طور پر52 ارب 58کروڑ 87لاکھ 60ہزار روپے کے فنڈز کی منظوری دی۔ترجمان پلاننگ اینڈ ڈویلپمنٹ بورڈ کے مطابق اجلاس کی صدارت چیئرمین پلاننگ اینڈ ڈویلپمنٹ بورڈ ڈاکٹر نعیم رئوف نے کی۔

صوبائی ورکنگ پارٹی کے اجلاس میں ترقیاتی بورڈ کی جانب سے جن سکیموں کی منظوری دی گئی ان میں وزیر اعلی پنجاب آسان کاروبار فنانس مرکزکیلئے 9 ارب 26کروڑ 40لاکھ روپے، وزیر اعلی پنجاب آسان کاروبار فنانس سائوتھ کیلئے 8ارب 58کروڑ 60لاکھ روپے، وزیر اعلی پنجاب آسان کاروبار فنانس نارتھ کیلئے 6 ارب 68کروڑ 60 لاکھ روپے، وزیر اعلی پنجاب آسان ایکسپورٹ فنانس برائے سمال میڈیم انٹرپرائزز کیلئے 4 ارب 26کروڑ 60لاکھ روپے، ڈسکہ، مندرینوال، جامکی، چیمہ شہر میں سیوریج اور سیلابی پانی کی نکاسی کے نظام میں بہتری کیلئے 8 ارب 2کروڑ 36لاکھ روپے، لیہ شہر میں سیوریج اور سیلابی پانی کی نکاسی کے نظام میں بہتری کیلئے 8 ارب 78کروڑ 63 لاکھ 20 ہزار روپے، اٹک شہر میں سیلابی پانی کی نکاس کے نظام کی بہتری کیلئے 3ارب 17کروڑ 8 لاکھ 40 ہزار روپے اور موجودہ لاہور میٹرو بس سسٹم گرین لائن سٹیشنوں کی بحالی دوبارہ تشکیل اور سولرائزیشن کیلئے 3 ارب 80کروڑ 60لاکھ روپے شامل ہیں۔

(جاری ہے)

اجلاس میں صوبائی سیکرٹری پی اینڈ ڈی بورڈ رفاقت علی سمیت چیف اکانومسٹ محمد مسعود انور، متعلقہ سیکرٹریز، محکمہ جات کے اعلی افسران اور پنجاب پلاننگ اینڈ ڈویلپمنٹ بورڈ کے ممبران نے شرکت کی۔