اپنامیٹر ۔اپنی ریڈنگ موبائل ایپ پر صارفن کیلئے از خود میٹر ریڈنگ کی سہولت موجود ہے، کیسکو

پیر 4 اگست 2025 18:03

کوئٹہ(اُردو پوائنٹ اخبارتازہ ترین - این این آئی۔ 04 اگست2025ء)وزارت توانائی (پاور ڈویژن) حکومت پاکستان کے احکامات کی روشنی میں پاور انفارمیشن ٹیکنالوجی کمپنی (پی آئی ٹی سی) کی جانب سے ملک کے تمام بجلی تقسیم کار کمپنیوں کیلئے "اپنا میٹر، اپنی ریڈنگ" کے نام سے ایک جدید موبائل ایپ متعارف کروائی گئی ہے جس کے ذریعے تمام صارفین اب اپنے بجلی میٹر کی ازخود ریڈنگ لے کر براہ راست اپنے متعلقہ کمپنی کو بھیج سکتے ہیں۔

اس ایپ کے استعمال سے نہ صرف بلنگ کے عمل کو شفاف بناناممکن ہوگیاہے بلکہ صارفین کو اندازے سے لگائے گئے غلط میٹر ریڈنگ اور اضافی بلوں کی شکایات سے بھی نجات دلانے میں معاون ثابت ہوسکے گا ۔اس سلسلے میں کوئٹہ الیکٹرک سپلائی کمپنی (کیسکو)کے تمام صارفین کیلئے بھی یہ ایپ گوگل پلے اسٹور اور ایپل ایپ اسٹور پر دستیاب ہے جس کا استعمال بھی نہایت آسان ہے۔

(جاری ہے)

تمام صارفین سب سے پہلے اپنے اکاؤنٹ کی تفصیلات رجسٹر کریں پھر اسکے بعد ہر ماہ کی مقررہ تاریخ سے قبل اپنے میٹر کی تصویر اپ لوڈکر یں۔یہ اقدام بجلی کے صارفین کے اعتماد کو بحال کرنے اور بلنگ کے نظام میں مزیدشفافیت لانے کی جانب ایک انقلابی قدم ہے۔اس لیئے تمام صارفین یہ ایپ اپنے موبائل میں انسٹال کرکے اس سہولت سے فائدہ اٹھائیں۔اس ایپ کو اپنے موبائل فون میں ڈاون لوڈکرنے کے بعد اپنے برقی میٹر کی تصویر اپ لوڈ کرکے درست ریڈنگ جمع کرواسکتے ہیں۔ لہٰذا کیسکو نے اپنے تمام صارفین سے اپیل کی ہے کہ وہ آج ہی- اپنا میٹر، اپنی ریڈنگ موبائل ایپ ڈاؤن لوڈ کریں اور بلنگ کے عمل میں خود شریک ہوں۔