بجلی سستی ہونے کا امکان

سینٹرل پاور پرچیزنگ ایجنسی نے گزشتہ مالی سال کی چوتھی سہ ماہی ایڈجسٹمنٹ کی مد میں نیپرا سے قیمتوں میں کمی کی باقاعدہ درخواست دائر کر دی

محمد علی پیر 4 اگست 2025 18:10

لاہور (اُردو پوائنٹ اخبارتازہ ترین۔ 04 اگست2025ء) بجلی سستی ہونے کا امکان، سینٹرل پاور پرچیزنگ ایجنسی نے گزشتہ مالی سال کی چوتھی سہ ماہی ایڈجسٹمنٹ کی مد میں نیپرا سے قیمتوں میں کمی کی باقاعدہ درخواست دائر کر دی۔ تفصیلات کے مطابق نئے مالی سال کے دوسرے ماہ کا آغاز ہونے کے بعد ملک بھر کے بجلی صارفین کو بجلی کی قیمت کی مد میں ریلیف ملنے کا امکان ہے۔

میڈیا رپورٹس کے مطابق بجلی کی قیمت میں فی یونٹ ایک روپے 75 پیسے کمی کا امکان ہے۔ سینٹرل پاور پرچیزنگ ایجنسی (سی پی پی اے) نے مالی سال 2024-25 کی چوتھی سہ ماہی ایڈجسٹمنٹ کی مد میں نیپرا سے قیمتوں میں کمی کی باقاعدہ درخواست دائر کی ہے، جس پر نیشنل الیکٹرک پاور ریگولیٹری اتھارٹی (نیپرا) آج سماعت کرے گی۔ درخواست منظور ہونے کی صورت میں بجلی صارفین کو مجموعی طور پر 53 ارب 39 کروڑ روپے سے زائد کا ریلیف ملے گا۔

(جاری ہے)

یہ سہ ماہی ایڈجسٹمنٹ نہ صرف سرکاری ڈسٹری بیوشن کمپنیوں (ڈسکوز) بلکہ کے الیکٹرک پر بھی لاگو ہو گی۔ ذرائع کے مطابق اگر نیپرا اتھارٹی ستمبر، اکتوبر اور نومبر کے لیے ایڈجسٹمنٹ کی منظوری دیتی ہے تو صارفین کو 2 روپے 10 پیسے فی یونٹ تک کا ریلیف مل سکتا ہے جب کہ اگست، ستمبر اور اکتوبر کے لیے فی یونٹ ایک روپے 75 پیسے کی کمی کی تجویز دی گئی ہے۔ بجلی کی قیمت میں کمی کی منظوری دیے جانے کی صورت میں بجلی صارفین کے ماہانہ بجلی بلوں میں کچھ کمی ہو ہو گی۔ درخواست پر حتمی فیصلہ نیپرا اتھارٹی کی جانب سے درخواست پر سماعت مکمل ہونے کے بعد جاری کیا جائے گا۔