ایسا ماحول پیدا کرنے کی کوشش کی جارہی ہے کہ پیپلز پارٹی وفاقی حکومت کی سپورٹ نہ کرے، شرجیل میمن

کراچی ( اُردو پوائنٹ اخبارتازہ ترین۔ 05 اکتوبر2025ء ) صوبہ سندھ کے سینئر وزیر شرجیل انعام میمن نے کہا ہے کہ ایسا ماحول پیدا کرنے کی کوشش کی جارہی ہے کہ پیپلز پارٹی وفاقی حکومت کی سپورٹ نہ کرے، پنجاب حکومت پاکستان پیپلز پارٹی کی آڑ میں وزیر اعظم شہباز شریف کو نشانہ بنا رہی ہے، وزیراعلی کا سکرپٹ رائٹر ان کو غلط راہ پر لے جارہا ہے، نفرت پھیلانے کے بجائے متحد ہو کر چیلنجوں کا مقابلہ کریں۔

پریس کانفرنس میں انہوں نے کہا کہ سیلاب سے تباہی پر پی پی اور سندھ حکومت نے پنجاب کے بھائیوں کیلئے کوششیں تیز کیں، سیلابی صورتحال پر بلاول بھٹو زرداری نے وفاق اور وزیر اعظم شہباز شریف سے اپیل کی، بلاول بھٹو زرداری نے پنجاب کے سیلاب متاثرہ علاقوں کے دورے کیے لیکن پنجاب حکومت کی طرف سے پیپلز پارٹی کے خلاف من گھڑت مہم چلائی جا رہی ہے، پچھلے چند دنوں سے یکطرفہ مہم پنجاب حکومت کی جانب سے چلائی جا رہی ہے، اس وقت پنجاب کے لوگوں کی مدد کیلیے پورے پاکستان کو آگے آنا چاہیئے۔

(جاری ہے)

شرجیل میمن کا کہنا ہے کہ موسمیاتی تبدیلی کی وجہ بننے والے ممالک اور عالمی برادری سے امداد کی اپیل بنتی ہے، وزیر اعظم شہباز شریف نے رمضان پیکج کیلئے بھی بی آئی ایس پی کا ڈیٹا استعمال کیا، بی آئی ایس پی کو پارلیمنٹ نے قانون کے ذریعے قانونی حیثیت فراہم کی، کہا جا رہا تھا کہ کوئی خوددار شخص کیسے عالمی برادری سے اپیل کر سکتا ہے، ہماری اپیلیں وفاقی حکومت سے تھیں اس کا منفی ردعمل پنجاب حکومت سے آ رہا تھا، وزیراعظم شہباز شریف کے شکرگزار ہیں کہ عالمی برادری سے اپیل کی۔

انہوں نے الزام عائد کیا کہ پنجاب حکومت پی پی کو نشانہ بنا رہی ہے مگر ان کا اصل ہدف وفاقی حکومت ہے، ایسا ماحول پیدا کرنے کی کوشش کی جا رہی ہے کہ پی پی وفاق کو سپورٹ نہ کرے، پنجاب حکومت کا وفاقی حکومت کے ساتھ حسد جیسا رویہ سمجھ سے باہر ہے، پیپلز پارٹی کی آڑ میں وزیر اعظم کو نشانہ بنایا جا رہا ہے، ہم وفاقی حکومت کا حصہ نہیں لیکن ان کو سپورٹ کر رہے ہیں، وفاقی حکومت کے خلاف پنجاب حکومت کو اس سازش میں کامیاب نہیں ہونے دیں گے۔

صوبائی وزیر نے کہا کہ مشکل حالات میں سیاست نہیں کر رہے ہم پنجاب کے بھائیوں کیلیے پریشان ہیں، سیاست وہ کر رہے ہیں جو کام کم اور ٹک ٹاک پر زیادہ توجہ دے رہیں، ہم نے کبھی پنجاب کے خلاف بات نہیں ہم تو سیلاب متاثرین کی مدد کی بات کرتے ہیں لیکن وزیر اعلی پنجاب مریم نواز کا سکرپٹ رائٹر ان کو غلط راہ پر لے کر جا رہا ہے، کہا جاتا ہے میرے پیسے میری مرضی، میرا پانی میری مرضی، کوئی پڑھا لکھا شخص یا جس نے آئین پڑھا ہو کیا وہ ایسے بیان دے سکتا ہے؟ پنجاب حکومت چاہتی ہے کہ ہم ان کی پچ پر کھیلیں لیکن ہم کبھی مر کر بھی یہ نہیں کہیں گے کہ میرا کوئلہ میری مرضی، میرے ہسپتال میری مرضی کیونکہ یہ سب کچھ پاکستان کا ہے کسی کی کوئی مرضی نہیں۔

ان کا کہنا ہے کہ ہم سب وزیر اعظم اور وزیر اعلیٰ پنجاب کی بہت عزت کرتے ہیں، ہم سب نے یہی کہا ہے مریم نواز ہماری بہنوں کی طرح ہے، کوئی ہمارا فیملی ممبر بھی غلط راستے پر ہے تو اسے سمجھانا ہمارا کام ہے، میری پریس کانفرنس کا مقصد کسی کو ڈی گریڈ کرنا نہیں ہے، جنوبی پنجاب میں لوگ مدد کے لیے رو رہے ہیں، بے نظیر انکم سپورٹ پروگرام سے فوری ریلیف دیا جائے، عالمی برادری سے اپیل کی جائے، پنجاب کے عوام ہمارے اپنے ہیں، اگر پنجاب کے عوام پریشان ہوں گے تو ہم بات کریں گے، پنجاب کے عوام کی مدد کیلئے وفاق سے دس بار اپیل کرنا پڑی تو کریں گے، پنجاب میں بلدیاتی انتخابات فوری کرائے جائیں۔

شرجیل میمن نے کہا کہ کام کم اور ٹک ٹاک پر زیادہ کام کیا جارہا ہے، ہمیں دھمکیاں مل رہی ہیں آپ کی انگلیاں توڑ دیں گے، ڈرنے والے نہیں۔ پیپلز پارٹی کی لیڈر شپ کبھی معاہدے کرکے بھاگی نہیں، میرا پانی میری مرضی جیسی باتیں کوئی آئین کو ماننے والا نہیں کرسکتا، میں بھی سو چیزوں پر کہہ سکتا ہوں میرے وسائل میری مرضی لیکن میں نہیں کہوں گا، میری بجلی میری گیس میرا کوئلہ میری مرضی کہہ سکتا ہوں لیکن نہیں کہوں گا، نفرت انگیز بیانات کو پروموٹ نہ کریں، ہم آپ سے لڑنا نہیں چاہتے، آپ زبردستی ہمیں میدان میں نہ اتاریں، پنجاب حکومت کے ساتھ کوئی لڑائی جھگڑا نہیں۔