شہیرا جلیل الباسط نے اپنے آنیوالے پراجیکٹس سے پردہ اٴْٹھا دیا

پیر 4 اگست 2025 22:36

کراچی (اُردو پوائنٹ اخبارتازہ ترین - این این آئی۔ 04 اگست2025ء)ڈرامہ سیریل ’رضیہ‘ سے شہرت کی بلندیوں کو چھونے والی پاکستانی اداکارہ شہیرا جلیل الباسط نے اپنے آنیوالے پروجیکٹس سے پردہ اٴْٹھا دیا۔ایک انٹرویو میں اداکارہ نے بتایا کہ فاطمہ جناح‘ نامی ویب سیریز کے پہلے سیزن کی شوٹنگ اپریل میں مکمل ہوئی ہے جس میں انہوں نے جواہر لال نہرو کی بہن کا کردار نبھایا ہے جبکہ ایک اور پروجیکٹ ’خان‘ بھی جلد نشر کیا جائے گا، جس میں انہوں نے آمنہ کا کردار نبھایا ہے۔

انہوں نے بتایا کہ ان کی پیدائش سندھ کے دارالحکومت کراچی میں ہوئی، ان کے والد یوسی ناظم رہے ہیں اور وہ 2018 سے قبل فل برائٹ اسکالر شپ پر تعلیم حاصل کرنے امریکا گئی تھیں۔امریکا میں انہوں نے فلسطینیوں کے حقوق کی جدوجہد کی، جس وجہ سے ان کا نام ایک ایسی آرگنائزیشن میں شامل کیا گیا، جسے فلسطینیوں کے حقوق پر بات کرنے کی وجہ سے دہشت گرد تسلیم کیا جاتا ہے۔

(جاری ہے)

اداکارہ کے مطابق امریکا سے واپسی کے بعد انہوں نے وفاقی دارالحکومت اسلام آباد میں پبلک ایڈمنسٹریشن کی ملازمت کی، جسے چھوڑ کر انہوں نے اداکاری شروع کی۔شہیرا جلیل الباسط نے بتایا کہ 2018 میں امریکی اسکول میں فائرنگ میں ہلاک ہونے والی سبیکا شیخ ان کی کزن تھیں جنہیں انہوں نے منتیں کرکے وہاں سکالر شپ پر پڑھنے کیلئے بھیجا تھا۔