وفاقی وزیرپیٹرولیم نے گیس کے نئے کنکشنز پر پابندی جلدختم کرنے کا عندیہ دے دیا

وزیراعظم کی ہدایت پر سمری کابینہ کی انرجی کمیٹی کو بھیج دی ہے، سمری کی منظوری کے ساتھ ہی نئے کنکشنز پرپابندی ختم ہوجائے گی، لوگوں کو ایل پی جی سلنڈر سے چھٹکارا مل جائے گا۔ وفاقی وزیرعلی پرویز ملک

ثنااللہ ناگرہ پیر 4 اگست 2025 22:15

وفاقی وزیرپیٹرولیم نے گیس کے نئے کنکشنز پر پابندی جلدختم کرنے کا عندیہ ..

اسلام آباد ( اردوپوائنٹ اخبار تازہ ترین۔ آئی پی اے ۔ 04 اگست 2025ء )وفاقی وزیر برائے پیٹرولیم علی پرویز ملک نے گیس کے نئے کنکشنز پر پابندی جلدختم کرنے کا عندیہ دے دیا۔انہوں نے کہا کہ وزیراعظم کی ہدایت پر سمری کابینہ کی انرجی کمیٹی کو بھیج دی ہے۔ انہوں نے جیو نیوز کے پروگرام میں گفتگو کرتے ہوئے کہا کہ گیس کے کنکشنز پر اچھی خبر ہے کہ وزیراعظم نے واضح ہدایت کی ہے کہ امپورٹڈ ایندھن جو وافر مقدار میں موجود ہے، اس کی بناء پر اگر گیس کے نئے کنکشن دینے ہیں تو بالکل دیں، ہم نے سمری کابینہ کی انرجی کمیٹی کو بھیج ہے، جیسے ہی اس کی منظوری ہوگی تونئے کنکشن پر پابندی ختم کردیں گے، جس سے لوگوں کو ایل پی جی سلنڈر سے چھٹکارا مل جائے گا۔

آرایل این جی آج بھی ساڑھے تین ہزار کے اوپر بھی ایل پی جی سے 30 فیصد سستی ہے۔

(جاری ہے)

انہوں نے کہا کہ کسی بھی ایشو پر سنسنی پھیلانا آسان ہوتا ہے لیکن حکومت میں ایک ذمہ دارعہدے پر بیٹھتے ہیں تو یہ ایک کانٹوں کی سیج ہوتی ہے۔اوگرا نے اپنی ریونیو ضروریات نکالی ہیں، جس کے تحت 240ارب روپے کی ڈائیورژن ہے،جو مسائل کی وجہ سے پاور لفٹ نہیں کررہا۔1800روپے کے اوپرفی ایم ایم بی ٹی یو پر ہمارا حساب بنتا ہے اس میں 90 فیصد لاگت گیس کی ہے، 5فیصد کمپنیوں کیلئے منافع کی گنجائش ہے، 5 فیصد ٹرانسمیشن اور ڈسٹری بیوشن کے اوپر ہوتی ہے، اگر آئندہ دو تین ماہ میں یہ مالی بوجھ کم ہوکر 20، 30ارب رہ جاتا ہے۔

اور 100 ارب کی مقامی گیس لے آتے ہیں جو بند کرنا پڑتی ہے اگر 130ارب پر جان چھوٹ جاتی ہے تو عوام پر 100ارب کا بوجھ کم ہوجائے گا۔ تو اس گیس بل کی قیمت خود بخود کم ہوجائے گی۔ گزارش یہ ہے کہ اگر 1500روپے پر گیس آبھی جائے تو وہ ملک جس کے پاس وسائل نہیں ہیں، تو وہ کون سا جادو کا چراغ ہے جس کے ذریعے وہ 300روپے ماہانہ گیس دیتا رہے گا؟