چیئرمین سی ڈی اےکی زیر صدارت اجلاس ، اہم منصوبوں کی پیش رفت کا تفصیلی جائزہ

اسلام آباد (اُردو پوائنٹ اخبارتازہ ترین - اے پی پی۔ 04 اگست2025ء) چیئرمین کیپیٹل ڈویلپمنٹ اتھارٹی (سی ڈی اے) و چیف کمشنر اسلام آباد محمد علی رندھاوا کی زیر صدارت سی ڈی اے ہیڈکوارٹرز میں ایک اہم اجلاس منعقد ہوا۔ اجلاس میں سی ڈی اے کے ممبر ایڈمن و اسٹیٹ طلعت محمود، ممبر انجینئرنگ سید نفاست رضا، ممبر انوائرمنٹ اسفندیار بلوچ، ممبر فنانس طاہر نعیم، ممبر پلاننگ ڈاکٹر خالد حفیظ، ڈی جی ورکس فیصل رضا گاڈی ، ڈی جی پلاننگ ڈاکٹر ظفر اقبال، ایڈیشنل کمشنر اسلام آباد، صاحبزادہ یوسف، ڈائریکٹر ڈویلپمنٹ اینڈ فنانس، بشریٰ رائو ، ڈپٹی ڈی جی انفورسمنٹ، ڈائریکٹر ڈی ایم اے ڈاکٹر انم فاطمہ سمیت دیگر سنئیر افسران نے شرکت کی۔

اجلاس میں ڈویلپمنٹ پراجیکٹس جن میں شاہین چوک، کشمیر چوک، ٹی چوک، فیض آباد انٹرچینج، سی ڈی اے ماڈل نرسری کو 'گارڈینا حب' منصوبے میں تبدیل کرنے، پاک سیکریٹریٹ کی اپ لفٹنگ، جدید سٹریٹ لائٹس کی تنصیب، سالڈ ویسٹ مینجمنٹ نظام کی بہتری، اسلام آباد ماڈل جیل کا قیام، پولیس اسٹیشنز کی اپ لفٹنگ، بلیو ایریا میں فوڈ اسٹریٹ کا قیام، پارکنگ پلازہ کی تعمیر، سی ڈی اے میں کیش لیس نظام، سفاری پارک، تھیم پارک، کیبل کار، فیری ویلز، ڈانسنگ فاؤنٹین کی تنصیب جیسے اہم منصوبوں کے بارے میں اب تک کی پیش رفت کا تفصیلی جائزہ لیا گیا۔

(جاری ہے)

چیئرمین سی ڈی اے نے ہدایت کی کہ تمام پراجیکٹس کو مقررہ وقت کے اندر مکمل کئے جائیں، اس سلسلہ میں معیار اور کوالٹی پر کوئی سمجھوتہ نہیں کیا جائے گا، مزید ان پراجیکٹس کا بعد میں تھرڈ پارٹی آڈٹ بھی کرایا جائے گا۔چیئرمین سی ڈی اے کو بتایا گیا کہ پی ڈبلیو ڈی سے بہت سے پراجیکٹس سی ڈی اے کو ٹرانسفر ہوئے ہیں جن کو مکمل کرنے کیلئے فنڈز کی اشد ضرورت ہے۔

چیئرمین سی ڈی اے نے ممبر فنانس سی ڈی اے اور سی ای او ایم سی آئی کو ہدایت کی کہ پی ڈبلیو ڈی سے سی ڈی اے کو ٹرانسفر ہونے والے تمام پراجیکٹس کی فنانشل اسٹڈی کی جائے جن میں پراجیکٹ کی مکمل رقم، فنڈز کی پی ڈبلیو ڈی کو فراہمی اور متعلقہ پراجیکٹس پر پی ڈبلیو ڈی کی طرف سے خرچ ہونے والی رقم کے مکمل فنانشل رپورٹ تیار کی جائے اس کے علاوہ پلاننگ اور انجنئیرنگ ونگ سی ڈی اے کو ٹرانسفر ہونے والے پراجیکٹس کے معیار اور کوالٹی کے ساتھ ساتھ اس بات کا بھی جائزہ لیا جائے کہ متعلقہ پراجیکٹس کتنے عرصہ سے زیر تکمیل ہیں اور اس وقت انکی فزیکل پوزیشن کے بارے میں مکمل رپورٹ تیار کی جائے تاکہ اسے متعلقہ وزارت اور ادارے کے ساتھ شیئر کرنے کے ساتھ ساتھ ان تمام پراجیکٹس کو مکمل کرنے کیلئے مکمل لائحہ عمل اور اسٹریٹجی بنانے کے ساتھ ساتھ مطلوبہ فنڈز کا انتظام کیا جاسکے۔

چیئرمین سی ڈی اے نے اسلام آباد میں ماڈل جیل کے علاوہ پولیس اکیڈمی کی اپ لفٹنگ کے کام کو جلد از جلد مکمل کرنے کی ہدایت کی۔چیئرمین سی ڈی اے نے اسلام اباد میں الیکٹرک بسوں کی تعداد میں اضافہ، چارجنگ سٹیشنز کی جلد از جلد تعمیر کے علاوہ اسلام اباد میں الیکٹرک ٹرام کے منصوبے کی فیزیبلٹی جلد از جلد تیار کرنے کی ہدایت کی ۔انہوں نے ائی ٹی فیسلیٹیشن سینٹر کی تعمیر کے لیے تمام تمام تر وسائل بروئے کار لانے کی ہدایت کرتے ہوئے کہا کہ تمام شاہراؤں پر ڈیجیٹل سٹر یمرز ، خوبصورت لائٹس اور ماحول دوست پودے لگانے کے علاوہ شہر کے 279 پارکس کی اپ لفٹنگ کے لیے تمام وسائل بروئے کار لائے جائیں. انہوں نے کہا کہ بلیو ایریا میں فوڈ سٹریٹ کو جلد از جلد فعال کرنے کے علاوہ پارکنگ پلازے کو بھی مکمل فعال بنایا جائے ۔

انہوں نے کہا کہ وہ ذاتی طور پر تمام پروجیکٹس کا اچانک دورہ کریں گے تاکہ کام کی رفتار اور معیار کا جائزہ لے کر متعلقہ مسائل کو فوری طور پر حل کیا جائے گا۔ انہوں نے کہا کہ سیکٹر ائی- 14 اور بنی گالہ میں سیوریج کی پائپ لائنز بچھانے اور سیوریج کا نظام بہتر کرنے کے علاوہ اسلام آباد کے تمام سیکٹرز میں پانی کی فراہمی کے لیے اقدامات اٹھائے جا رہے ہیں۔ انہوں نے کہا کہ سی ڈی اے کمرشل پلاٹوں اور دکانوں کے شاندار نیلامی کے بعد جو فنڈز اکٹھے ہوئے ہیں ان کو ڈیویلپمنٹ پروجیکٹس، پانی کی فراہمی اور ماحول دوست پودے لگانے پر خرچ کریں گے تاکہ اسلام اباد کی شہریوں کے مسائل حل کرنے میں مدد مل سکے۔