پڑھی لکھی خواتین کو معاشرے میں آگے آکر ملک کی باگ دوڑ میں اپناکردار ادا کرنا چاہیے،گورنر پنجاب

منگل 5 اگست 2025 21:00

لاہور (اُردو پوائنٹ اخبارتازہ ترین - اے پی پی۔ 05 اگست2025ء) گورنر پنجاب سردار سلیم حیدر خان نے کہا کہ پڑھی لکھی خواتین کو معاشرے میں آگے آکر ملک کی باگ ڈور میں اپناکردار ادا کرنا چاہیے،ملکی سیاست میں محترمہ فاطمہ جناح اور شہیدبینظیر بھٹو ایک مثال ہیں،پیپلزپارٹی نے اپنے دور اقتدار میں خواتین کیلئے گراں قدر خدمات سرانجام دیں۔ ان خیالات کا اظہار انہوں نے منگل کے روز یہاں گورنر ہائوس لاہور میں ویمن چیمبر آف کامرس اینڈ انڈسٹری گجرات کے وفدسے ملاقات کے دوران کیا جنہوں نے صدر ویمن چیمبر گجرات صائمہ سرفراز اور تاجر رہنما وقار ایوب بٹ کی قیادت میں ان سے ملاقات کی ۔

ملاقات میں ملکی معیشت اور کاروباری معاملات میں خواتین کے کردار پر تبادلہ خیال کیا گیا۔گورنر پنجاب نے کہا کہ ملک کی معاشی ترقی میں خواتین کابڑھ چڑھ کر حصہ لینا قابل تحسین ہے۔

(جاری ہے)

انہوں نے کہا کہ ملکی سیاست، تجارت اور زندگی کے ہر شعبے میں خواتین نے اپنا لوہا منوایا ہے۔گورنر پنجاب نے کاروباری سرگرمیوں میں حصہ لینے والی خواتین کو ایک پلیٹ فارم فراہم کرنے پر ویمن چیمبر آف کامرس اینڈ انڈسٹری کے کردار کو سراہا۔

انہوں نے کہا کہ والدین بچیوں کو پڑھانے لکھانے اور اتنی ڈگریاں حاصل کرنے کے بعد گھروں میں نہ بٹھائیں بلکہ انہیں باہر نکل کر اپنی صلاحیتوں سے ملک کی ترقی میں کردار ادا کرنے کے مواقع دیں۔انہوں نے کہا کہ پیپلزپارٹی نے ہمیشہ اپنے دور اقتدار میں خواتین کے لیے سرکاری ملازمت میں کوٹہ رکھا اور روزگار کے مواقع فراہم کئے۔انہوں نے کہا کہ خواتین کی ہراسمنٹ کے خلاف حکومت زیرو ٹالرنس اختیار کیے ہوئے ہے۔انہوں نے مزید کہا کہ صدر مملکت آصف علی زرداری کے حکم کے مطابق گورنر ہائوس کے دروازے تاجر برادری کے مسائل حل کے لیے ہر وقت کھلے ہیں۔انہوں نے کہا کہ میرا خواتین کو معاشی طور پر بااختیار بنانے اور انہیں معاشرے میں باعزت مقام دلانے کے لیے بھرپور تعاون رہے گا۔