سعودی عرب، کنگ عبدالعزیز فاؤنڈیشن حج اور حرمین شریفین کی تاریخ، ثقافت اور فن تعمیر بارے بین الاقوامی فورم نومبر میں منعقد کرے گی

بدھ 6 اگست 2025 12:07

ریاض (اُردو پوائنٹ اخبارتازہ ترین - اے پی پی۔ 06 اگست2025ء) سعودی عرب کی کنگ عبدالعزیز فاؤنڈیشن فار ریسرچ اینڈ آرکائیوز رواں سال نومبر میں حج اور حرمین شریفین کی تاریخ، ثقافت اور فن تعمیر بارے بین الاقوامی علمی فورم منعقد کرے گی جس کا عنوان ’’حج اور حرمین شریفین، تاریخ، ثقافت، فن تعمیر ۔ پائیدار علم اور ڈیجیٹل دستاویزات کی طرف‘‘ ہے۔

اردو نیوز نے منتظمین کے حوالے سے بتایا کہ یہ فورم وزارت حج و عمرہ اور ضیوف الرحمٰن خدمات پروگرام کے اشتراک سے منعقد کیا جارہا ہے جس کا مقصد مقدس مقامات کے تاریخی ورثے کی دستاویزی حیثیت کو مضبوط بنانا اور اسے جدید تحقیق سے جوڑنا ہے۔ فورم میں دنیا بھر سے مختلف علمی شعبوں سے تعلق رکھنے والے محققین شرکت کریں گے جن میں تاریخ، فن تعمیر، اسلامی فنون، ادب، جغرافیہ، میڈیا اور ڈیجیٹل سٹڈیز شامل ہیں۔

(جاری ہے)

منتظمین کا کہنا ہے کہ فورم میں 5 اہم موضوعات پر گفتگو کی جائے گی جن میں حرمین شریفین کی خدمت میں سعودی عرب کا کردار، حج اور حرمین تاریخی تحریروں اور سفر ناموں میں، حرمین کی فن تعمیر اور بصری شناخت، حج ثقافتی یادوں اور سماجی ورثے میں اور حج دستاویزات میں جدید ٹیکنالوجی شامل ہیں۔ فاؤنڈیشن نے فورم کے لئےتحقیقی مقالے وصول کرنا شروع کردیے ہیں جو ستمبر تک جمع کرائے جا سکتے ہیں۔ منتظمین کا کہنا ہے کہ وصول ہونے والے مقالات کا ایک ماہ کے اندر جائزہ لیا جائے گا، اس کے بعد ایک ماہ کا وقت ترمیم کے لیے دیا جائے گا۔ حتمی طور پر منتخب مقالات کا اعلان ترمیمی مرحلے کے 2 ہفتے بعد کیا جائے گا۔