آپریشن سندور میں شکست کے بعد مودی حکومت کا جنگی جنون بے قابو

بدھ 6 اگست 2025 18:27

نئی دہلی (اُردو پوائنٹ اخبارتازہ ترین - اے پی پی۔ 06 اگست2025ء) جنگی جنون میں مبتلا مودی کی زیر قیادت بی جے پی حکومت کے جارحانہ اقدامات سے سرحدوں پر محاذ آرائی کا خطرہ بڑھنے لگا ہے۔کشمیرمیڈیاسروس کے مطابق مودی حکومت کی طرف سے خطے میں ڈرون ہتھیاروں کی دوڑ شروع کرنے سے جنوبی ایشیا کا امن دائوپر لگ گیا ہے۔بھارتی ذرائع ابلاغ کے مطابق بھارتی فوج نے بٹالین سطح پر ڈرونز کو مستقل ہتھیار بنانے کا فیصلہ کر لیا ہے۔

آپریشن سندور کے بعد ڈرونز کو بھارتی جنگی حکمتِ عملی میں مرکزی حیثیت دی جا رہی ہے جبکہ انفنٹری، توپ خانے اور بکتر بند یونٹس میں ڈرونز چلانے کے لیے خصوصی ٹیموں کی تشکیل جاری ہے۔ذرائع ابلاغ کے مطابق ڈرونز کی مدد سے ہدف کی شناخت اور حملے کی صلاحیت میں اضافہ کیا جا رہا ہے، انجینئر رجمنٹس کو بارودی سرنگوں کی شناخت کے لیے ڈرونز دیے جائیں گے۔

(جاری ہے)

بھارتی فوج ہیلی کاپٹروں پر انحصار کم کرنے کے لیے ڈرون ایوی ایشن کو وسعت دے رہی ہے۔بھارتی میڈیا کے مطابق آرمی ایوی ایشن میں ڈرونز کی تعیناتی بھارتی فوجی حکمتِ عملی میں بڑی تبدیلی کی علامت ہے۔ بھارتی فوج جدید جنگ کے لیے اینٹی ڈرون صلاحیت بھی حاصل کر رہی ہے۔بھارت کی ڈرون بیسڈ جنگی حکمت عملی سے خطے میں طاقت کا توازن تیزی سے بگڑ رہا ہے۔ آپریشن سندور میں شکست کے بعد بھارت کا ڈرون نیٹ ورک وار فیئر کی جانب جھکائو بڑھنے لگا ہے۔مودی حکومت جدید ہتھیاروں کی خریداری سے آپریشن سندور کی خفت مٹانے کی کوشش کر رہی ہے۔بھارت کی نئی جنگی پالیسی خطے میں امن کو مزید نازک اور غیر یقینی بنا رہی ہے اوراس کی اسلحے کی دوڑ سے خطے میں جنگ کا اندیشہ بڑھ گیاہے۔