دفتر ایس پی ٹریفک وارڈن سیدو شریف میں تقریب تقسیم انعامات کا انعقاد

جمعرات 7 اگست 2025 11:52

پشاور (اُردو پوائنٹ اخبارتازہ ترین - اے پی پی۔ 07 اگست2025ء) ٹریفک وارڈن پولیس سوات کے زیرِ اہتمام تقریب تقسیم انعامات کا انعقاد کیا گیا جس میں ایس پی ٹریفک وارڈن حبیب اللہ خان سمیت دیگر ٹریفک افسران و اہلکاروں نے شرکت کی۔ ایس پی ٹریفک وارڈن حبیب اللہ خان نے بہتر کارکردگی پر اہلکاروں میں توصیفی اسناد اور نقد رقوم تقسیم کی۔ تقریب کے دوران ایس پی ٹریفک وارڈن حبیب اللہ خان نے ٹریفک عملے کی کارکردگی کو سراہا اور کہا کہ ٹریفک وارڈن پولیس کے افسران و اہلکار پہلے سلام پھر کلام کی پالیسی پر عمل پیرا ہو کر ڈیوٹیاں انجام دیں اور ٹریفک قوانین پر عملدرآمد کو یقینی بنانے کے لئے تمام تر صلاحیتیں بروئے کار لائیں۔

انہوں نے مزید کہا کہ تمام افسران و اہلکار پوری جانفشانی کیساتھ ٹریفک کی روانی اور شہریوں میں روڈ سیفٹی کے حوالے سے شعور اجاگر کرنے کیلئے کردار ادا کریں۔

(جاری ہے)

ایس پی ٹریفک وارڈن حبیب اللہ خان نے کہا کہ ٹریفک وارڈن پولیس میں سزا و جزا کا عمل اسی طرح جاری رہے گا ،بہتر کارکردگی دکھانے والوں کی حوصلہ افزائی کی جائے گی جبکہ غفلت برتنے والوں کے خلاف تادیبی کارروائی کی جائے گی۔

ایس پی ٹریفک وارڈن حبیب اللہ خان نے ٹریفک حکام اور اہلکاروں کو ہدایت کی کہ وہ شہر میں نو پارکنگ زون میں گاڑیاں کھڑی کرنے والوں اور تجاوزات مافیا کے خلاف بلا تعطل آپریشن جاری رکھیں اور کسی کے ساتھ کوئی نرمی نہ برتی جائے۔ انہوں نے کہا کہ غفلت کا مظاہرہ کرنے والوں کے خلاف محکمانہ کارروائی کی جائے گی ۔