لانڈھی ایکسپورٹ پروسیسنگ زون میں گارمنٹس فیکٹری میں اچانک آگ بھڑک اٹھی

واقعے کی اطلاع ملتے ہی ریسکیو ٹیمیں موقع پر پہنچ گئیں اور فیکٹری کے عملے کو محفوظ مقام پر منتقل کردیا گیا

ساجد علی جمعرات 7 اگست 2025 12:17

لانڈھی ایکسپورٹ پروسیسنگ زون میں گارمنٹس فیکٹری میں اچانک آگ بھڑک ..

کراچی ( اُردو پوائنٹ اخبارتازہ ترین۔ 07 اگست 2025ء ) صوبہ سندھ کے دارالحکومت کراچی کے لانڈھی ایکسپورٹ پروسیسنگ زون میں واقع گارمنٹس فیکٹری میں اچانک آگ بھڑک اٹھی۔ فائر بریگیڈ حکام کے مطابق آگ پر قابو پانے کی کوششیں جاری ہیں، اس مقصد کے لیے پانچ فائر ٹینڈرز کا عملہ جائے وقوعہ پر موجود ہے اس کے علاوہ مزید 4 گاڑیاں بھی روانہ کر دی گئی ہیں کیوں کہ آگ کی شدت میں مسلسل اضافہ ہو رہا ہے جس کے باعث صورتحال سنگین ہوتی جا رہی ہے، اس واقعے میں تاحال کسی جانی نقصان کی اطلاع موصول نہیں ہوئی، ریسکیو ٹیمیں موقع پر موجود ہیں اور فیکٹری کے عملے کو محفوظ مقام پر منتقل کیا جا رہا ہے۔

چند روز قبل سٹی کورٹ کراچی میں گزشتہ رات لگنے والی آگ سے ڈسٹرکٹ ایسٹ کی لفٹ اور سیکڑوں مقدمات کا ریکارڈ جل گیا، عدالتی عملے نے بتایا کہ شارٹ سرکٹ سے لگنے والی آگ سے فوٹو اسٹیٹ مشین جل گئی، آگ لگنے سے دوسری منزل پر رکھا پولیس ریکارڈ بھی جل گیا جہاں پولیس نے ضلع ایسٹ کی عدالتوں کا ریکارڈ لفٹ کے قریب رکھا تھا، آگ سے سٹی کورٹ کے ایف اور جی بلاک بجلی سے محروم ہوگئے۔

(جاری ہے)

عدالتی عملے نے بتایا کہ آگ رات دیر گئے دو سے ڈھائی بجے کے درمیان لگی، جب فائر بریگیڈ پہنچی تو لفٹ اور مقدمات کا ریکارڈ جل چکا تھا، آگ نے سٹی کورٹ کے ایف بلاک کی بلڈنگ کو بھی نقصان پہنچایا ہے، آگ سٹی کورٹ کے ایف بلاک میں لفٹ کی جانب لگی تھی، آگ لفٹ کے راستے سے تیسری منزل تک پہنچی جہاں تیسری منزل پر بنچز اور الماری آگ کی لپیٹ میں آئیں۔