آج جو کچھ ہو رہا ہے وہ نفرت کو جنم دے رہا ہے، شیر افضل مروت کا ایوان میں حملے پر کمیٹی بنانے کا مطالبہ

جمعرات 7 اگست 2025 21:04

اسلام آباد (اُردو پوائنٹ اخبارتازہ ترین - این این آئی۔ 07 اگست2025ء)رکن قومی اسمبلی شیر افضل مروت نے کہا کہ آج جو کچھ ہو رہا ہے وہ نفرت کو جنم دے رہا ہے۔قومی اسمبلی اجلاس میں رکن اسمبلی شیر افضل مروت نے اظہار خیال کرتے ہوئے کہا کہ پیپلز پارٹی اور مسلم لیگ (ن )نے چارٹر آف ڈیموکریسی پر دستخط کیے تھے، کیا اس لیے آج سیاسی جماعتوں کے ساتھ یہ سلوک ہو رہا ہے۔

(جاری ہے)

انہوں نے ماضی کے حوالے سے بات کرتے ہوئے کہا کہ کچھ عرصہ قبل سابق چیف جسٹس ثاقب نثار نے جو کچھ کیا اس سے بھی عدلیہ کی توقیر کم ہوئی۔شیر افضل مروت نے کہا کہ آج بھی یہی کچھ ہو رہا ہے، آج آپ ہمیں دہشت گرد بنا رہے ہیں۔وکیل رہنما نے کہا کہ یہ وقت گزر جائے گا لیکن اسمبلی کے باہر ایجنسی اور پولیس کا کھڑا ہونا یاد رہے گا۔انہوں نے کہا کہ ایک دن کے لیے مجھے یہ اختیار دیں میں دیکھتا ہوں کوئی ایک اہلکار باہر کھڑا ہو کر دکھائے۔انہوں نے مطالبہ کیا کہ اس ایوان میں حملے پر ایک کمیٹی بنائی جائے۔